10 agosto: Dopo la solita corsa al cantier, finia po' en tel travaso del vim, finalmente digo ai veci che l'altro ieri me som compra' en biglietto aereo per Stoccolma. D'altronde se sto a casa la stimana che vem, i ha mess brutt temp (i programmi dei 4000 ferragostani che gh'evo col Davide i è saltai... oltre alla rumba de stasera che dovevo far con elo, la so dona e l Danuiel su per Bolzan a degustar vini: gh'è l'ostell piem e no gh'è treni, diaolopo'! ...e a guidar no ghe penso neanca en poc!), i soci del paess i è da na stimana en ferie serai en casa per el tempaccio, e el cantier, l'è meio che el lasso polsar, e allor... Gh'è da nar! Dopo zena, al bar, quando el digo ai soci, i è tuti entusiasti e el Togni per prim el me racconta la leggenda della Trombonave (beh... zerchè con google Trombonave... l'è propri famosa! Zerto che la destinaziom per mi l'era involontaria... ma se gh'è da nar...): en pratica vorria aggregarse anca el Gioppi e l Silva se ghe trovo en bigliett a bom prezzo. Steccada la serata a bever vim a Mescolanze e trat su l'anima a casa, alle 2 e 1/2 de not ghe zerco bem el bigliett aereo, ma 300 Euro i è massa (mi ghe n'ho dati men de 200): vabbè narò da sol!

11 agosto: Ieri sera, per telefono, gh'evo accennà anca a me fradèl del viaz, e vist che som de strada (parto dall'aeroporto de Treviso), el me ospita en dì a Jesolo en tel so albergo (l'è lì en ferie co la so dona). E così, fatt el zaino e cargà la moto, vago a Roveredo en biblioteca a torme i libretti de Svezia e Finlandia (me piaserìa arrivar a Helsinki) e vado dalle Pope a far colaziom col Silva e l Gioppi. Ma a casa ho desmentegà l'armonica a bocca: no podo ancor partir! Torno a Trembelem, raccatto l'armonica e me envio for per la Vallarsa che l'è mezdì e n quart. Dopo aver schivà per en pel el stop dei carabinieri ai Anghebeni, passà la Valdastico devo perder mezz'ora comoda a dribblar i 20 Km de coda de auto ferme en uscita alla barriera de Mestre. Tre giri a vuoto a zercar l'albergo e finalmente per le 3 e 1/4 ghe som! Piazzà en camera, nem subit en spiaggia a ciapar el sol lasém la so dona sulla sdraio quando con me fradel fago na camminada de n'ora fin alla fin della spiaggia vers est! E così alle 7 ne fiondém sotto la doccia e nem al ristorante dell'albergo: el costa en botto, ma la zena l'è compresa! Magnem da re e bevem de pù. Nem for per la zità tuti gasai (eh... a bever massa!) e come revival del mare da boci (quando erem mi l Manuel e l Gioppi) no podem no noleggiar en risciò. Som embriac ma guido mi. La dona de me fradèl la vede i zorzi verdi quando dribblo piante e vago anca sula statale! Po' ingaggem na sfida con en risciò de terroni: i brusém! Consegnà el risciò, col noleggiator che el s'ha stupì da sudà che ero, fem en giro en spiaggia e vers le 1 nem en let.

12 agosto: Fatta la mega colaziom vers le 9 e 1/2 nem en spiaggia. Col Manuel sto colp ne enviem a pè vers ovest (lasem la so dona da sola al sol): dopo mezz'ora che nem, i ne ciama: diaolopò! Gh'è lì el Nane co la so dona! E così col Nane e n so socio nem al baracchim a torne en par de birrette e fumar en par de zighereti.... finchè no me ciama la dona de me fradel ncazada... diaolopò che tardi! L'è mezdì e 1/4! Tornem de volta, magnem na ciopa e fatta la docia vers le 2 e 1/2 parto en moto per l'aeroporto de Treviso. Dopo aver trattà el parcheggio per na stimana a 35 Euro, fago el check-in e me compro en par de libri da lezer sta stimana. Alle 6 e 25 puntuale parte el volo Ryanair e atterrem 30 minuti de anticipo. Credevo de nar a Stoccolma, ma sul bigliett quando ho vist destinaziom Nyköping per n'attimo ho pensà i me mandesa en Giappone. Alle 9 e 1/2 som zà en aeroporto che zerco de informarme su come nar all'ostell del paess: doman de matina, appena levà tolerò el treno per Stoccolma che l'è a 100Km da qi. Vist che el prossimo autobus per el centro el parte alle 10 e 1/2, me accordo con na coppia de Treviso e per 6 Euro a testa ne fem accompagnar en taxi. Lori i passa qi sol na not: i è drio a nar en ferie e Riga (Estonia) dalla nonna de ela. Piazzà zo le robe en te l'ostell Railway (som en dormitori da sol...e per daverze porte e casseforti basta telefonar e farse dar i codici...) me trago en centro a far en giro al bar: no gh'è anima viva! Dopo 20 minuti a pè me trao en te l'unico pub davert e chi trovo? El Giovanni e la so dona (la coppia de Treviso che ha tolt el taxi con mi) e così ne sentem al taol parlando del più e del meno finchè a forza de birre (diaolopò 4 Euro l'una!) e zighereti fem chiusura. A mezanot e meza som sotto le coerte.

13 agosto: Levà alle 8 e meza, fat su el zaino e pagà l'ostell (175 Skr) me trao a far colaziom en staziom dei treni a spetar el treno per Stoccolma delle 10 e 1/4. En tel giro de n'ora som zà a destinaziom e me giro la staziom per zercar qualche cartina per arrivar all'ostell che ho prenotà (che l'è na barca ormeggiada sul canal!). Girando per la staziom ciapo en bel spagot quando en bocieta con so papà l me ciapa per man : pensevo i me volessa ciavar el marsupio/taccuim! Cammina, cammina me traverso for tutta Gamla Stan (l'isola coi palazzi pù bei de Stoccolma) che l'è straaffolada e arrivo en te l'ostell endo che i me mette en te na quadrupla. Molà zo el zaino passo a far en giro en centro e palazzi propri bei! Vedo el cambio della guardia con banda al seguito al palazzo reale e... en casim de zent. Dopo n'insalata al McDonald e na ciopa de peperoncini del supermercato (e na birra, che qui, diaolopò, i le pol vender che le fa al massimo 3,5 gradi) torno en ostell a polsar fin ora de zena. Som en camera con altre do putèle tedesche de Hannover che è appena arrivà dalla traversata a pè della foresta, en quindes dì, da Nyköping a Stoccolma! L'ostell nol g'ha la cosina e così me tocca nar en centro a magnarme na pizza e na birra (de quelle normali, ma la pago 6 Euro!). E così me giro a pè la zona centrale e quella dell'ostell, e per le 11 me trao en let. A mezzanot me leva le done e le me para for de camera! Co la scusa che è arrivà 2 so amiche le me diss che quella l'è na stanza per le donne e che me devo spostar alla numero 9! Diaolopò! Stronze! ... e ghe l'ho savesta dir!

14 agosto: Stamattina levo en po' demoralizzà perchè no so sa far: diaolopo’ la me solita tecnica de conoser zent en le cosine dei ostei fasendo na bona pasta, no la funziona se l’ostell nol g’ha la cosina! e allor... fago check-out, vago all'ostell principale en centro e l'è piem. Vardo per n'ora all'internet caffè i prezzi per Copenaghen: naria volentera a far en salt en Danimarca, ma me par che lì la vita l'è carissima! 45 Euro per n'ostell e... ghe n'è sol uno en zità... ensomma a mezdì me decido! Vago al terminal della Viking Line, al porto, e me compro en bigliett de sola andata sul traghett per Helsinki: se va en Finlandia! Magnà en par de ciope col salam e peperoncino trat zo en terra al molo come en zinghem, alle 4 som zà lì che fago check-in per el traghett. Ho ben pensà anca se la nave l'è piena de pub, disco..., de comprarme anca en let en cabina. Salto sulla nave e en camera (quadrupla) som con en russo de nome Marian e 2 romani (uno Andrea, l'altro... boh!). Giust el temp per na doccia e alle 5 la nave la salpa. Vago a far na tonda: finalmente qi i vende birra che fa pù de 3,5 gradi! E allora al pub sul ponte all'aperto, endo che i è drio a far musica dal vivo, me togo na candola de Lappai per 4 Euro: ma la birra lappone la fa propri schifo! Me encontro sul ponte con Marian, che fumando ensema en zigheret el me conta che l'è drio a vegnir en Finlandia a torse en monolocale, per po' tornar a so cà a S.Pietroburgo. El parla inglese pochissimo, ma vist che l'è stà tre mesi ensema a na putela a Firenze, el capiss el 'taliam assà. Torno po' al bar a torme n'altra birra e con en giro al duty-free della nave, me togo en par de Heineken (non annaquae!) en lattina per n'euro l'una. Dopo aver magnà 2 spicchi de pizza al bar (7 Euro!!!) me trago en cabina a dormir fin le 10 e 1/2. Gh'è da nar! Con en salt al pub irlandese, raccatto i 2 taliani e nem a far en giro en disco... l'è voda, diaolopò! Anca se en par de bele putele le gh'è bem che gira! Me encocono en la sala da ballo al piano de sotto su en divanét, finché, no vem lì en putél finlandese piem de alcol che zercheva el so socio, a parlarme su: me digo che da a passi che l'era, le sboccae sul giroscale della nave la mattina dopo, le era sue! Dopo aver ritrovà i altri do italiani e passà na mezz'ora en disco a fumar zighereti e vardar le ballerine spagnole (...e na svedese mora da cavar el fià) se torna en cabina per le 2 e 1/2.... alle 10 se sbarca! ... ma ancor no so che el fuso orario della Finlandia l'è n'ora envanti! Per fortuna, per sicurezza metto su la sveglia alle 8 e 1/2!

15 agosto: e infatti, appena me rendo cont che sem n'ora envanti, trao tutt rento alla bona en tel zaino, magno na brioches al bar e smonto. Finlandia! Subit seguo el putèl russo, che l'è zà vegnù qi en zona, e me fago accompagnar all'ostell. L'è piem... ma se volem na doppia i ne la dà per 53 Euro... a testa???!! No evo capì che la cifra l'era da spartir en doi, ma dopo do telefonae ai ostei entorno alla zità, vist che è tutt piem, me accordo per tor la doppia col russo (26 euro a testa) .... e.... che bella stanza! e che ostel!! TV, cosina, sauna! de tutt! L'unico me dubbio l'è quando i me domanda i documenti: Marian el ghe passa la carta d'identità rumena! Mah! Fao finta de nient. Adess elo el tol el treno per Turku o Tampere per zercar casa, mi enveze narò a far en giro en centro a noleggiar na bici. All'uscita incontrem anca i do putèi romani che no avendo trovà alternative i era drio a spetar che i ghe liberesa na stanza. Vago al noleggio bici (15 euro al dì) e me fao dar bici e mappa coi percorsi ciclabili... Farò la via blu: 3 ore con en giro esterno sulle penisole entor Helsinki. La bici l'è de quele che te freni tirando i pedai endrio: che strano! Propri come quelle che m'eva sempre contà che gh'eva me nonna Dina. Parto lungo la costa, ma dopo 3 deviaziom sbaglio ancor la via... dopo aver quasi emboccà el traghett per Tallin (Estonia) vago decisamente for dalla cartina e me trovo en tel paess de Tapiola. Co la tecnica della bussola co la lancetta dell'oroloi, oriento la cartina e rieso a tornar en pista! Adess l'è na monada, basta seguir el lungo mare, e così me fermo a torme na Coca al barét sul porto e via vers el centro! Dopo do foto al giardino botanico e l stadtMuseum drio la staziom dei treni, vago alla Silja Line (la compagnia estone concorrente della Viking Line) per farme far en preventivo de ritorno en Svezia col traghett: ma l'è le 5 e 1/2... l'è zà serà... E così me toccherà ciapar la trombonave!!! ;) Alle 6 e 1/2 riconsegno la bici e dopo na birra davanti al supermarket, e raccattà en balonzim de elio aggratis (che ne farem for col Marian la mattina dopo, saludandone), corro en ostell a far la pasta. A Marian gh'evo promess la zena, e de solit el magna bonora... L'encontro sull'uss, tornem su per metter su l'acqua della pasta : en cosina gh'è anca na coppia (sui 50) de svedesi. Entant che cosino, el russo el me diss che l va for dall'ostell n'attimo... e allora me stappo la bozza de Sangiovese che m'ero portà drio (barattada a Jesolo con do boze del me Muller Thurgau, con me fradel) e ghe magno drio anca na mezza forma de parmigiano Reggiano. Ne aprofitto così de offrirghen en po' alla famiglia svedese per far conoscenza. Ma la pasta l'è pronta e l Marian, dopo mezzora no l'è ancor tornà. Magno da sol e me scolo 3/4 de bozza de ross. Finalmente l'ariva e per scusarse el m'ha portà na latta de birra: la bevo, ma vist che a lù no ghe piass el vim, prima finisso anca la bozza de ross! Lavà zo, ne trém davanti all'ostello a fumar zighereti na bona ora e stem a parlar con tutti: gh'è i 2 romani, che era en traghet con noi, che i va alla festa en centro, parlem con en putèl de Monaco, uno de Bergamo che è drio a laorar a Londra... po' vist che le birre le feva el so effetto (e mi gh'evo zo anca na bozza de ross!!) e ormai ero en confidenza col Marian, ghe domando perchè el g'ha la carta d'identità rumena: el me conta tutt. I ultimi quattro anni l'ha vivèst en Russia a magnar for tutt quel che l'eva ciapà da na rapina(?) con altri 2 so soci, ma adess che i l'eva sgamà nol pol pù tornar en Romania e ghe toca scampar per l'UE...Ensomma l'è en mez a en bel casìm, ma l'è en bom putèl (quando el me domanda de religiom ghe conto i me pellegrinaggi.. elo l me diss che l'è ortodosso e che anca ancoi el s'ha fat la so visita en ciesa) e per mi l'ha fat na monada da boci: ancoi el compie 25 anni, quindi l'è roba che l'ha fat a 20 anni... En zità gh'è festa... gh'è da nar! Al vialom endo che gh'era el palco, l'è le 10, e no gh'è pù nient, e allora ne trem sulla via principale e nem en tel prim disco pub a bever na bona birraccia. Diaolopò che figaio! El Marian el vol a tutti i costi trovarmen una... ma scambiandose i sguardi con quelle che me varda drio quando vago a tor da bever... el men raccatta tutte sora i 38/40 anni... no,no,no! Eppure ghe n'è propri de belle: le svedesi more coi oci verde/azzurro ghiaccio l'è le meio... e anca en disco, me encroso col sguardo e.... da cavar el fià! Dopo en litro e mez de birra e alquanti zighereti nei locali de Marienhakatu, vers le 2 tornem all'ostell: stasera gh'era i autobus che porteva gratis de bar en bar... ma adess avem bevù assà! Encontrem sull'uss dell'ostell i do romani alle 2 e ½ e dopo en zigheret ensema tutti e 4, l'è propri ora de nar a polsar!

16 agosto: Dopo aver provà a domandar l'estension de na not en ostell e i ne diss che è tutt pien e ne tocca nar via, me trovo en lett all'Erottajanapato (ostell en centro). El Marian el parte en treno per Turku, e i do romani i torna a Stoccolma col traghett ancoi. Passo così a torme el bigliett della Trombonave per doman (che pago el doppi de ancoi! da 49 a 88 Euro!con cuccetta...) e molo zo el zaino en ostell. Passà a magnar en boccom a pizza Hut, vago en direziom della staziom en tel parco endo che me fermo tre bone ore a ciapar el sol e scriver ste righe. Passà così a torme na T-Shirt per la sera (vist che no g'ho voia de lavarme quelle sporche...) dopo aver controllà che en ostell ghe sia la cosina, vago a beverme na biretta al minimarket R-KIOSK e po' a far la spesa al supermercato: birra, mezzepenne Barilla, sugo all'arrabiata e brioches Wiener (sì!!!! Le ho trovae anca qi ste bone brioches!!!! L'era na roba che me mancheva dalle ferie en U.S.A.!) per doman a colaziom. Tornando all'ostell ciapo le prime do goze de acqua de ste ferie: beh dai, almen ha fat bel tutt el dì, adess l'è za le 7 e 1/2 de sera. En ostell, trata l'acqua a scaldar sul gas, conosso subit na coppia de na putela spagnola (che figa!) con n'argentim, e po' en taliam da Ferrara (che è qi a far tirocinio da infermier) e do putèi da Firenze (qi en ferie da dese dì). No me som presentà con nessuni (so sol che uno l se ciameva Federico), ma stasera vao fora a far serata coi taliani: i vol nar al Lux: na disco, a so dir, propri bella! Dopo en par de zighereti e na ciacerada con en putèl Irlandese dark de Galway, me butto en lett a spetar che i taliani de Firenze i faga la valiss: i parte stanott alle 5 en bus per l'aeroporto: i vol far en dritto! Me endromenzo, ma alle 10 e 3/4 i ven a svegliarme: gh'è da nar! E via! Dopo 5 minuti che camminem (e som ensognà for dai modi, vist che evo giust dormì n'ora) arriva en sguàz da foc: dopo aver spetà 15 minuti sotto en coert, decidem de trarne rento en tel bar/ristorante al de là della strada, po' quando smetterà de piover narem en disco. Sto ristorante, stasera el g'ha rento anca en concerto metal. Dopo en par de birre, parlando del pù e del men, entant che ghe spiego el me laoro de Trent a uno dei do de Firenze (vist che anca elo en tel dopo università el fa el tecnico informatico), en tei taoli vizim al noss vem for storie da matt.... e passem na mezzora a far finta de parlar, vardandone entorno e rider come matti. Alla me sinistra gh'era do lesbiche che se strussieva sul taol e le se metteva en posa coi ritratti esposti en tel ristorante e le se feva foto da matt. Po' alla me destra, me som girà n'attimo: e gh'era na putela che se cambieva le braghe... e le mudande rosse en mezz alla sala!!! G'ho encrosà el sguardo propri entant che l'era nuda completa e la m'ha sorridèst... diaolopò! e pensar che sol per vederle senza reggiseno, da noi, en inverno, ne tocca nar a far zima coi sci en Austria! Alle 2 i ne para fora che ancor diluvia. Aspettando che el zeda, osservém le finlandesi che sotto el sguaz le se gode propri: quando le trova na pocia le ghe salta rento fim ai ginoci (coi tacchi!) e le ride!!! Na bella risada ne la fem anca noi 4 a tornar all'ostell... in 10 tappe fermandone ogni 20-50 metri sotto i coerti a ripararne daal'acqua. E ne ciava anca i semafori... spetem el vert pedonale per partir... ma alle 2 se smorza zo tut! Altrochè lampadina fulminada (no gh'è el giallo lampeggiante)! E così dopo en "bon viaggio a tutti"(i fiorentini i torna a cà, l'altro putèl el se fa en giro a Turku) ricambià con en "bona trombonave" a mi, alle 2 e 1/2 vago en lett: è zà drio a albeggiar!!!

17 agosto: Levo alle 9 e 1/4 e entro le 10 besogn far check-out. I tipi che ha fat serata con mi al gieri i è zà tutti nai, ma en napoletan en camera el me domanda de nar a bever en caffè al bar entant che se sveglia i so soci. Lori i era drio a tornar da en viaz (tour de force) de na stimana dalle 3 repubbliche baltiche. Le putèle via là le è bellissime, el me diss, ma l'è piem de russi e besogn star molto attenti a no vardarghe drè alle so done! Nem così a zercar el prim bar davèrt e per 6 Euro a testa riusim a comprar en caffè (broda) e na brioches. Tornà en ostell, saludo tutti, lasso lì el zaino (passerò a torlo dopodisnar prima de imbarcarme) e fago check-out. Me envio vers el molo/staziom dei treni, ma sul vialom vegno affiancà da en marine neozelandese en pensiom (co la scusa de darme na man a trovar la strada, vist che ero drio a vardar la cartina...). El resta stupì no poc da quante gh'en so sulla geografia anca della Nuova Zelanda (lù l'è de Nelson) e l me consiglia de nar al porto e tor la barca per visitar l'isola fortezza de Helsinki. ....sol che nol la finiss pù de parlar... e quando el se mette a ballar l'AKA degli ALL-Black en mez al vial l'è veramente imbarazzante (diaolopo', el gh'eva la lengua verda!). Rieso a somenarlo, e enveze che alla fortezza, vago al parco drio la staziom a scriver ste righe. Lì i è drio a montar el circo: gh'è cavai e bécchi che pascola tranquilli en tel prà. Sto lì fin le 2 dopodisnar a ciapar el sol, quindi, torno en ostell a raccattar el zaino e me envio vers el terminal al porto della Viking Line: TROMBONAVE!!!!! Fat el Check-in e assistì al spettacolim delle hostess en maschera che le distribuiva cioccolatini (no,no,no l'era guldoni...) me trago en cabina. Som con 2 romani e n todesc. Dopo na polsada, alle 5 e 1/2 se salpa. vago sul ponte (bar all'avert) al pub Finlandia a bever na birra, ma tra che gh'è vent e che l'è mez nuvol, fora l'è propri fret! Me trago en branda per n'ora, po' torno su a zena con tre tranci de pizza e na birra comprada al duty-free (...eh co la scusa che la nave la fa scalo alle Åland island, e l'è paradiso fiscale... no se paga neanca el solito 25% de IVA, vist che la sede fiscale della Viking Line l'è propri alle Åland!). Me butto zo fin le 23, po'... gh'è propri da nar "en pastura"... bevo en litrozzo al deck 7(settimo piano), all'Irish pub, vist che la disco al piano de sora l'è ancor voda.... ma co la burrasca che gh'è, stasera l'è dura camminar dritti! Me trovo lì anca coi do romani (come sempre, no me som presentà... uno me par el se ciamessa Francesco...l'altro, quando g'ho ditt che ero trentin, l'era tutt gasà a pensar alle ferie che el s'era sempre fat su per Penia de Canazei! Diaolopo', al Ciampac da me cosini?!). En salt en sala da ballo (evito el Black Jack del tavolo verde... zà l'altra sera Marian el gh'eva lassà lì assà!) a vardarse entorno....mah! o l'è putelote (che no è ancor scampà en disco) o l'è ultraquarantenni, tutt el rest l'è... italiani (e infatti for per i ostei de Stoccolma evo ben let i messaggi italiani sulle lavagne: ...mezzi i era dedicati alla tromboscialuppa!). Diaolopo'! A parte en catafalco che me varda drio, e che rieso a scamparghe, entant che me fumo en zigheret con el romano en la smokingRoom, ghe sarìa bem una sui 45 che ghe prova... ma set fora?!??!!! Vago su en disco a bever birra e ballar (sballotolà dalla burrasca) fin le 3 e 1/2 (giust perchè ancoi, col cambio de fuso orario se guadagna n'ora) e me trago en tel let. La cabina l'è al completo,... manca sol el romano che evo vist su en pista con na quindicenne....

18 agosto: altrochè quindicenne! Alla fin l'ha dit che el voleva provar na nova esperienza: l'è finì co na 45enne con fiola al seguito! En pratica na situaziom propri strana: prima i ha lassà la cabina libera perchè la fiola (15 anni) la fessa le so robe con en putelòt conossù en nave, po' i l'ha parada fora e so mama la s'è ciulada el romano (l g'ha 15 anni de men! Diaolopo'!). Vabbè, se ciava la trombonave, smonto e alle 10 som zà all'ostello barca a far el check-in. Per 100 Corone i me noleggia la bici per tutt el dì e allor ne aprofitto per en girèt. Prima vago alla staziom centrale a comprarme el bigliett del pulmann che doman el me riporterà all'aeroporto Skavsta de Nyköping, po' do' n'ocio alle previsiom del temp (...eh... doman, voia o no.... me tocca farli vendemar zo a cà... senno' l'ua la va marza!), quindi me envio lungo la costa vers el bel quartier de Kungsholmen (l'è tutt en parco!) e po' col mega-ponte che porta a Södermalm fago tappa a Långsholmen endo che i è drio a far la sagra delle minichitarre: almen 300 persone, grandi e boci, che se sfida sul palco a sonar canzon co le minichitarre. Tornà a Slussen (endo che è ancorà la nave ostell) me butto zo a ronfar... g'ho da recuperar qulche bella ora de som. Me bevo na birretta, scrivo ste do righe, e entant arriva anca i altri 3 occupanti della cabina: do putèi calabresi e 1 brescian. Parlando del pù e del men della situaziom italiana e del sud Italia, coi calabresi vao su a bever na birra (en ostell, quando i ne vede co la lattina i ne la vol sequestrar encazzai!) e finirghe el pachèt de zighereti al calabrese. Tornai po' tutti en stanza, stem tutti e 4 en camera a parlar e bever birra fin le 10 la sera! Po', el brescian (Federico) el ne envida a veder el concerto elettropop al DeBaser de Södermalm (quartier alternativo e pù alla bona... anca per el vestir) e i 2 calabresi i propone el ritrovo alle 23, vestidi bem (en tel zaino, la g’ho bem drio la camisa da figo!...e anca en par de scarpe dalle feste!), per nar a far serata en tei locali fighetti de Ostermalm. Me envio a pe' a Slussen per zercar da magnar en boccom (purtoppo, qi, i ostei co la cosina l'è na rarità....): gh'è tutte le strade serae! Stanot gh'è la Midnight Marathon de 10 Km con 17.000 partecipanti entorno a Södermalm!!! Tra na roba e l'altra, dal Pizza Hut i me para for perchè i è drio a serar e me tocca nar a magnar en veggie burger al McDonald. Vegnù fora, ormai l'è le 11 e 1/2 (e quindi, ho sforà sull'appuntamento coi calabresi), però lì davanti gh'è en casim de zent che assiste alla maratona e.... som a DeBaser!!! Che lusso! E così me lancio. Vago rento alle 11 e 1/2 con 165Skr. Tutt l'è pront per el concerto: gh'è do stanzoni enormi altissimi allestidi a atrio-bar e discoteca. Me togo na birra e subit encontro el Federico tutt gasà perchè taca el concerto.... e zà carburà vist che no l'eva zenà e qualche bella birra el l'eva zà trata zo. El me spiega en po' de sto concerto de Vive la Fête e l va al banco a tor en giro de tequila. Taca el concerto: la cantante l'è propri bella (ex modella, d'altronde...) e la musica l'è bella pestada... Sem rento frasai come le sardèle, ma è tutti gasai dal concerto. Dopo n'altro giro de tequila gh'è do tipe che me se caccia drio e da gasae che le è le me empianta i gombeti en te la schena... finì el concerto vers le 1 e 1/2 el salon el se svoda subit e allora raccato altre do birre e ghen porto una a Federico che entant l'è nà for a ciapar en fià de aria (i ultimi attimi del concerto, da frasai che erem mancheva propri l’aria!). Riprende la musica da discoteca e stem rento a bever n'altra birra... ma diaolopo', vist che appena finì el concerto è na via anca le fighe ... meio nar! Ne fumen en zigheret en piazza e ne enviem a pe' all'altro DeBaser, quel de Slussen: lì gh'è na fila da paura e donne... miga! E allora stem lì a fumar n'altro zigheret e parlar dei mili viazi en le zità europee che ha fat l Federico (el s'è raccomandà de Danzica: lì gh'è gnagna da vender!) e alle 2 e 1/2 dopo aver puntà la sveglia alle 8 e 1/2 me buto en let.

19 agosto: Diaolopò... la sveglia l'ha ben sonà alle 8 e 1/2, pecà che el cell el gh'evo ancor sull'ora finlandese e così alle 7 e 1/2 ho fat levar tutta la camerata! Ne trem su tutti e 4 a far colaziom (i 2 calabresi, ieri sera, alla fin, i era massa cotti dalle visite ai musei fatte durante el dì e no i era neanca nai fora) per 60 Skr e parlem concitai della belezza delle varie zità europee: ma l'arte migliore la g'avem noi en Italia! Scambiae le email, saludem i 2 calabresi che torna a Göteborg dopo aver visità el palazzo reale, e col Federico (che el va all'aeroporto de Arlanda per tor en volo per Malmo) nem alla staziom centrale a tor i rispettivi autobus per i aeroporti. Mi parto alle 11, dopo na serie de spintoni da paura per saltar en corriera e per 1/2dì e 1/2 som a Nyköping all'aeroporto Skavsta... G'ho da finir for i ultimi soldi, e allora ... se ciava, magno en piattom da paura ciamà Hot Wok (che no riesso a finir) con na birra da 0,6 (e quella enveze la va zo tutta.... en dubiteve?) per 22 Euro! Le ultime monedine le farò fora al Duty Free a comprar caramelle.... piccanti! El volo el parte alle 4 con mezz'ora de ritardo, ma per le 6 e 1/2 som zà a Treviso a ritirar el vecio Transalp.... vem le 7 avanti che me envia, ma po', con na tirada unica (anca perchè, co la scusa che me s'è fulminà i fari della moto, no sarìa male arrivar a casa prima de not: en realtà en Valsugana dovrò bem empizar i abbaglianti...) en 2 ore e 05 fago Treviso-Trembelem! Arrivo a casa giust giust, che i ha finì de mostar la vendema de ancoi... che lusso! Qi tant per cambiar, no i ha polsà neanca en dì: ...e adess me toca ritacar anca a mi! Diaolopo'....

Ste pagine l'e' stae cargade volte