Porte de Trembelem - Zugna
E finalmente è arrivà el dì della partenza, en viaz de 4 dì a pè che tuti i paesani ne envidia: partìm da cà a pè per traversar tutt el versante destro della Vallarsa (sinistra idrografica) e quel sinistro nel ritorno, quindi tornando a cà a pè.... en giro de 100Km e 4000 metri de dislivél, ma co la compagnia che sém la paura no l'è tant la longhezza del giro, quanto le serate alcoliche che ne speterà. Ne trovém alla ciesa alle 9 zaini en spalla: e che zaini! A parte mi che ho ridòt all'oss le robe da portar (beh, dai, quasi... na boza de limoncin e la borraccetta de sgnappa l'è en must!), el Gioppi el g'ha en zaino che neanca quei che ha mandà en Siberia g'aveva: sac a pelo da 2Kg, boza de vim, scarponi (che pero' vist che se pol farla anca co le scarpe da trek, come fao mi, el convinzem a lasarli a cà) e en BeautyCase che par n'altro zaino... Anca l'Herman con drio enfim en barattolom de sciuma da barba nol scherza! El Togni, enveze, el s'è sparmià demò la boza, ma l'è giustificà: i l'ha ciapà sotto col mulett la stimana passada: ancoi l'è el prim dì che l pol meter el nass for dal'uss. Passà a saludarne l'Alberto (che vist che l'è de colloquio el ne raggiungerà direttamente stasera en macchina al rifugio) e l Franco (che ne slonga na biretta de buon viaggio che copém subit) sem pronti: gh'è da nar! Ne enviém così su per el paess, sulla montagnola endò che taià drio el campo sportivo del paess traversém la provinciale e ne enfilém su per el Ghèrtele tegningone sempre sui senteri de sinistra (no gh'è segnalaziom... 'sti scortoi i li conoss sol i lòcal!) Vinti minuti e zà ghe sta la pausa per el prim goz de acqua e ciuciom de sgnapa. Avanti a testa bassa e per le 10 e 1/2 sém zà al ripetitor de Albaredo. Traversà la strada encrosém en veciot dela val che, sentù el giro che sém drio a far el ne smonta disendone che so fiol el l'ha fat en giornada! Beh, dai... quando po' el ne conta che l'è tornà al gieri dalla California per na gara podistica de 160Km, la tolém lizéra e ripartim. Ciapà la tagliafuoco sora i lavini de Marc, se prosegue sora el famos fungo de Albaredo e dopo en par de Km se finiss en ten spiazz col bivio: qi gh'è da polsarse per forza, vist che adess, tolt el bivio de sinistra, ne speta 20 minuti de pontèra che ne sbara su en ten blitz a malga Tof. L'è ormai le 11 e 1/2 passae: par brutt far tutt na tirada fim al rifugio, e anca se el temp i l'ha mess en peggioramento, vist che l'è ancor alt, decidém de magnar qi: ognuni ha portà drio qualcos... ciòpe, luganega, bagigi e... ovvio... la prima boza de vim besogn steccarla al volo! Sarà stà l'euforia della prima boza che senza neanca rendernen cont parte anca tutta la boza de limoncino! Bei ennebiai, coi primi toni che se sente arrivar ne enviém su per el bosc: altra pontèra e sém ai prai quando taca a sgozàr: poderesém ripararne en ten stol, ma vist che no la vem zo fissa passém davanti al monument dei caduti austroungarici e sulla sinistra empontém el sentér. Passà da kepofila, salto na curva a sinistra e subit ne trovém a far na ravanada da paura a passar for mughi: dopo en quart d'ora de battaglia, vist che de sentéri no gh'è traccia, decidem de perder quota vers destra e difatti subit ne ritachém alla strada propri endò che la ne sbara for sulla forestale del zimiteri de S.Giorgio... Ormai ghe sem, ancor 5 minuti de salita e ecco el rifugio enzima alla rampa: Berg Heil! e... Prost! (vist che no passa neanca en minut che sem zà tutti co la birra media en man... doe... tree.... po' finalmente ne alzém dale careghe a domandar en let per dormir per la not: i ne dà na camera tutta per noi: el rifugio l'è propri bel, e le camere, anca quelle tutte en legn, en spettacolo! D'altronde el rifugio i l'ha inaugurà sol domenega passada (quando infatti per tegnirme en moto ne evo approfittà per en salt en bici)! El temp de saludar i cosinòti Sofia e Giacomo che gh'è qi en campeggio, mandar n'SMS all'Alberto (che el ne raggiunge qi per zena) che el ne rimpingua de provviste alcoliche e passém ai caffè corretti e al Marzemin bom: e coi prezzi competitivi che gh'è qi, paghém giri su giri a cor lizer. Gh'è qi anca quei che prepara la trasmissiom "girovagando in Trentino", ma de zerto, l'è meio no i ne intervista vist el noss livell alcolico zà alt: entant fora ha tacà a piover alla grande, e difatti anca en MTBiker che è drio a far el giròm Roveredo-Zugna-Psso Buole-Ala el se ferma rento a spetàr che l cala. Per le 6 arriva anca l'Alberto portà su da so papà, che l se ferma qi giust el temp de n ross dato che el Togni co na battuta a luci rosse, el lo fa scampar a gambe levae...co la so solita finezza el gh'eva proposto la sega di gruppo: el vecio dell'Albert scampando l'ha sol dit "Coleman", ma da empanai che erem, quando avem capi' che nol se riferiva alla marca dei scarponi l'era za' parti' da en pez! Adess sém al completo: basta spetàr la zena che i ne la fa per le 8 e 1/2: ma co la luzia che g'avém, ne sentém al taol alle 8 e prima che i ne porta en taglier de antipasto, arrivém anca a scroccarghe na polpetta a testa alle maestre che gh'è lì a tegnir i boci del campeggio! Po' quando arriva le portate (ovviamente sempre accompagnae dal ross bom) tra riso ai funghi, polenta, puntine, spezzatino di cervo... magném fim a sciopar e no ghe la fem a finir tutt! En bom caffè per parar zò ensema a en grappim e vem prest le 10 e 1/2: adess sem propri ncendiai, finiti... e trati al banco bar, copém la serata con n'altra sgnapetta....E qi el delirio sel vede amplificà en tei filmati girai (che per rispett tegno privati....). Per le 11 e meza, en camera da lèt, neanca el temp de dir "Gute Nacht" e smorzar la luce che l Gioppi en taliam pulito pulito el diss (ovviamente ho omess de dir tutte le altre vacae vegnue for prima...digo sol che questa spediziom l'avem intitolada: "le pazze 2009") "OH... finalmente si può mettere a riposo i piedi: con questi tacchi oggi è stata una fatica... una cosa che non vi dico". Da lì è partì na risada comune che è durà n'ora comoda, finchè vers le una, la bèla putèla (che però la g'ha qi el béc) che dà na man a gestir el rifugio e dorme en la stanza de fianc, la da quattro colpi secchi al mur e la ne fa endromenzar... per la vergogna!


Zugna - passo Campogrosso (I)
Alle 8 sona la sveglia: no digo la sé che ho paì for per la not: i me s'è scolai for tutta l'acqua della boza che gh'evo drio el cusim e l'è dale 3 che lèco fèr co la lengua per farmela passar. L'avém portada for tutti abbastanza bem.... saltém zò dal lett, na netada de muss (e de denti, vist che l'Alberto el m'ha portà en tei rifornimenti de ieri sera anca en spazzolim nof per mi... e mi che pensevo de magnar cingum 4 dì!): ma la parte pù difizile l'è la vergogna, per el casim fat la not, de nar en sala da pranzo per la colaziom. Passém for tutti a testa bassa davanti al gestor: e per fortuna l'Alberto el ghe diss subit en scusa per el casim. Ma el gestor nol s'era neanca 'scort: "casim? averghen clienti così al bar!", anca se da drio, la putèla la diss bem "ma la nott....". En bom caffèlatte e marmelata e cargai i zaini en spalla l'è ora de encrosar i dei, vist che gh'è da domandarghe el cont (mezza pensiom+ross e grappe e caffè dela zena): con na bona arrotondada offerta dal gestor ne la cavém con sol 32 Euro!!! Ensomma... sto rifugio el deventerà el nos campo base per le sbaraccae del weekend! Le previsiom per ancoi le trà propri sul brutt, ma per le 9 e 1/2 sém en marcia soto el sol... Passà i vasconi del Zuna, deviém a destra e en direziòm passo Buole, scollinai tra Val d'Adige e Vallarsa, ne fermém na bona mezzora a vardar gruppi da dese camozi che passa lì vizini su e zò per le ròste. Finalmente passo Buole, giust dò minuti per far el punto della situaziom sulla cartina e continuem tra saliscendi sulla forestale che per mezdì la ne porta a Malga val di Gatto. A parte la balla del gieri, ancoi l'unica preoccupazione l'era per la caviglia del Togni (per via che l'è stà ciapà sotto el mulett)... per fortuna ieri sera, en tei rifornimenti portai dall'Alberto gh'era anca en par de bastoncini da trek: e par che contro al mal alle caviglie i funziona bem. Da malga val di gatto c'è la rampa che anche i rifugisti stamattina ci avevano preannunciato "fatta quella, se ieri avè bevù qualcoss, ve passa tutt!".... azz ma quant sarala erta? A vardar la pala sora de noi... tant! Ma per fortuna, dopo 10 minuti de salita spaccapolpacci gh'è en bivio sulla destra che ne fa deviar da Cima Levante e taiar vers sud, vers la val dei Ronchi, senza dovér per forza saltar su subit en gresta. Cammina, cammina, en tel giro de na mezzora ne ritachém al sentér fat 20 dì fa (confronta relaziom Cima Posta e Carega) e quindi l'è inevitabile fermarse a magnar sulle banchette enzima alla val a quota 1700... Sto colp, luganega, pam, bagigi, cioccolata, ma vim, quel no! Almen entant! L'è le una e 1/4 quando ripartim... la zima del Carega l'è zà scoerta da nuovoloni neri... ma tanto finchè gh'è brezza no l'è brutt segn: pecà che en tel giro de vinti minuti, finiss la brezza e en te n'attimo taca a piover, sempre pù forte: fermarse en ten stol? Na... ormai manca 2 minuti e sem al bivacco Sinèl: via de corsa sotto la grandine! Ghe sèm! All'inizio pensevem el bivacco fussa la casetta bianca davanti... ma l'è serada! E difatti, riparai drio el coèrt de questa l'avèm trovà giust drio: propri comot sotto el temporal, la grandine e le saette: anca se essendo en gresta -col cesso a tonf, drio en tel vajo- en po' de timor el le fa sempre! Ne cambiem coi vestiti suti e ne trém sotto le coèrte a spetar che l passa: nol passa.... e allor se ciava l'acidità de stoméc residua... bevém subit na bozzetta de ross... anca se, vist el fret che l'era (14 gradi dentro ma fora.... 10) en brulè el saria na zo anca meio! Finalmente vers le 4 i temporai i s'è spostai tutti vers sud e noi podém ripartir: el famoso canal che n'eva tant fat tribolar el mess passà (la bocchetta della neve l'era massa piena de nef per arrivarghe senza ramponi), sto colp, en 5 minuti el passém for: de nef ghe n'è ancor, ma mòla, poca e tracciada! Quindi passém for agevolmente la conca sotto cima Posta e en 40 minuti sem su Cima Carega: Berg Heil! L'è ormai le 5, ma no podém zerto rinunciar a en bom radler medio en rifugio! E così dopo dò ciacere col rifugista che el ne spiega el sentér da ciapar per smontar en italia (el sentér alt, l'era col cordim, ma el s'è staccà... quel bass el porta vers el Scalorbi... quel de mèz l'è el noss! Solita disposiziòm collaudata: primo l'Alberto, secondo mi, terzo Gioppi, quarto Togni, quinto... la scopa... l'Herman, che coi walkietalkie, anca se ne stacchém l'è sempre en contatto col capofila. Passà for la forcella, ne fiondém en tel vajo: bel ert, ma sui geroni, che sia miz che sia sut l'è uguale... La prima parte l'è pù rocciosa ed erta, la seconda, el Togni, che ormai el zopega vistosamente, el ne stupiss tutti co na sciada alla Bode Miller zò per i geroni. En bass enveze, a parte na me deviaziom sbagliada, el canalòm l'è ancor piém de nef per le vecie slavine e ne toca riciapar el sentér. Se costeggia tutt el bosc en piano per almen vinti minuti,quindi passai i pilastrini de confin del vecio impero austroungarico, entrém en Italia propri sull'uss del rifugio Campogrosso. L'è zà le 7 e 1/2, e la siora la ne fa sciopàr dal rider a parlar el dialètt veneto strét (par impossibile come en tel giro de 5 chilometri cambia completamente la parlada dal Trentìm al Vicentìm!). Subit la ne dà la camerata (tutta per noi), e incredibile: gh'è anca la doccia!!! Ma allor a qualcoss el Beauty el serviva! E allor scroccà el shampoo all'Alberto, el sugamàn al Gioppi e l dentifricio all'Herman me tiro per le feste. Alle 8 e 1/2 smontém famai come i luzi en sala da pranzo: gh'è lì demò 2 copiette: una de trevisani e una de todeschi.... e ovviamente subit taco bottom coi todeschi: ogni an lori i se fa en tòc del sentér E5 (che l'è po' quel che sém drio a far noi): l'am passà i ha fat el tòc sul lago de Costanza, st'am i fa la Bozen-Verona. Giro de birre medie, e arriva la pasta alla matriciana... mmm... beh.. dai... en piattòm da foc, ma l'avém magnà demò per fam... po' alla polenta funghi e formaggio sotto 2 déi de oio ne sém arresi quasi tutti. Meio beverghe sora n'altro par de birre medie, en caffè, en par de grappini e per le 10 e 1/2 sém veramente tutti keppottai... a passi... stasera le pazze non sono ubriache..... l'è el stràc dela caminada.


passo Campogrosso (I) - Lancia
Parte la sveglia delle 7 e 1/2, anca ancoi ne speta na siora scarpinada vist che prima dovém smontar al pian dele Fugazze, risalir fim al rifugio Papa e da lì traversar de lonc el Pasubio fim al rifugio Lancia. Na bona colaziom de pam e Nutella, pagà el rifugio (50Euro a testa all-inclusive) e per le 9 ne metém en marcia. L'è frét, nove gradi al coert sotto el rifugio: no envidiém per gnent i taliani che è drio a partir per far le vie de roccia del Baffelan qi davanti! Ovviamente no ciapém la strada asfaltada, gh'è el sentér: anca se subit el ne envia con 100metri de salita.... ma no dovém smontar de 300m? Scollinai, finalmente salta for el sol e tra le varie malghe perdém na bona quarantina de minuti a girar per zercar quela del socio del'Herman... e po' na volta trovada, giust en ciao veloce e da moni no ghe comprém neanca el formai: erem convinti de trovarlo zo al Pian dele Fugazze... Sotto le malghe el sentér el taia sora strada tra fòi bei grossi, po', dopo na bona mezzora se costeggia el versante tegnindose a destra e arrivém al M&B: ancor avanti e n te n'attimo sém al bar dele Fugazze a torne en caffè, comprar el pam (che però, ripartendo l'Herman el desmentega sul taol), zercar el formai (diaolopo'.... evem scambià el banchét dell'APT co la rivendita... niente formai!) e i zighereti per el Togni, che dato che qi no gh'è tabachini, l'è meio el se meta el cor en paze. Ale 11 e 35, soto el sol che sciòca ne enviém su per la pontéra del sentér che taia curve su curve su per la strada degli Eroi: la sterrata de 10Km che è tant comoda da far en bici.... ma longa da far a pè: el segnavia el mette el rifugio Papa a 2 ore e 40.... vedém se sem boni de far meio... e la mpontem dritta e veloce, passando zent su zent. Na bella sbarada de 600 metri e finalmente se vede la gresta co la galleria che ne riporta en Italia: ma da sta banda qi el temp l'è subit brutt e frét....quindi l'ultim tòc de avvicinamento al rifugio el fém tra nebbie e nuvoloni... e da sto versante qi, no gh'è tanti scorti da taiar, dato che no guadagnando quota, la strada la costeggia el versante en lonc fim al rifugio. Per le 1 e 10 ghe sem! Gh'è na calca da paura rento, ma star for a mbrumarse no l'è el massimo e quindi con en colp de culo trovém prest da sentarne zo e ordinar en bom par de taglieri misti e ovvio na birra media! Gh'è lì anca el Paol sentà zò all'altro taol, en servizio guida alpina con en gruppo su per la strada dele gallerie. Entant le nebbie le se enfittis sempre de pù e taca anca a sgozar: mmm ne toca spetar allor, demo' el temp de en brulè per scaldarse for! Alle 3, nebbia o no... gh'è da nar! E quindi ne mettem en marcia vers el Palon: anca se l'è nuvol, el temp el se alza enfretta, e podém torla comoda a ammirar tutti i monumenti della guerra che gh'è su per sti sentéri. Passém for el Dente italiano, e l'è impressionante veder come i è riusidi a demolir na montagna de roccia, embottendola de tritolo con delle gallerie da sotto! Na pausa de contemplaziom sul Dente Austriaco a lezer la targa en ricordo dei caduti piazzada dalla compagnia de Innsbruck, po' a smontar zo' g'ho n'incontro ravvicinato con na bella marmotta che a 5 metri la se piazza lì a vardarme per 3 minuti comodi... adess, tegnindone a sinistra costeggiem tutt el fianco sinistro del piccolo Roite e del Roite. L'è na dorsale tutta de prà e mughi, parecchio valanghiva, e a conferma, ai pei del pendio, gh'è zò ancor i mucioni de nef dele vecie slavine dell'inverno. El Togni el zopégha sempre pù vistosamente, ghe disém che par en paraplegico... tuta colpa del mulét! Traversà anca el Roite se arrivem al bivio: se ciapesem a destra, finiresem sulla forestale che dall'Alpe Pozza la porta al Lancia, ma noi, tegnindone a sinistra, for per senteri, scavezem sora la conca del rifugio e ghe arrivém frontalmente giust en te na vintina de minuti. L'è le 5 e meza, anca ancoi l'è fatta... gh'è da festeggiar, subit co na birraccia media, po'... eheh... qi al rifugio i vende la grappa bona al metro o al mez metro: con mez metro, per 12 euro i ne da' 6 grappini: sem en 5... perfetto!!! Chi offre... el ne beve doi!! E allor enviem subit la gara de beneficienza! En par de boni giri e l'è prest le 7: trém zo i zaini en camera e alla doccia, co l'acqua fredda che gh'è no ghe pensém minimamente. Ore 7:30.... mahlzeit!...e che magnada! Lasagne e canederli de prim, ossobuchi e tacchìm per secont, en bom dolce e anca se pieni come le rane, el posto per i giri de grappe el gh'è sempre! Entant el Togni el va for dall'uss a zercar de scrocar en zigheret: mi me prodigo a parlar todésc co na coppietta for en terazza: diaolopo'.... biondi tuti doi, i doveva per forza esser todeschi, quando alla fim la putèla la me risponde en todésc stentà, misto dialett veneto.... che figura! i era di Piovene Rocchette...o Piovène?? o Piòvéne??? ma... l'accento no l'ho mai capì... de zerto però dovevo capir che el rifugio ancoi l'era piem de taliani: de trentini me sa che gh'erem sol noi... e allor besogn dar l'esempio: altri 2 giri de sgnappa! Entant al taol enviem via discussiom sempre pù profonde tra la differenza de viver en zità e en paes: sulla privacy dei zitadini e sul fatto che se te fai en pét, en paess, no passa n'ora che i lo sa anca al paess de sora.... mah! Che discorsi... meio beverghe sora l'ultim giro, quando el gestor el vem al taol e el ne para en let: alle 10 e 1/2 i smorza le luci! Sém en camera con en par de veciòte taliane (partie ancoi dal passo Borcola) embriaghe stenche pù de noi: e se el Togni el scominzia a farghe su anca brutti pensieri erotici, el Gioppi nol se risparmiarmia de ritirar for l'argomento delle pazze: e coinvolger anca lore! Sono delle pazze anche loro! ...e no se pol darghe tort quando la siora la ne parla delle stelle che se move....Gute Nacht! Schlaf gut....bis morgen!


Lancia - Porte de Trembelem
Le previsiom del temp no le ghe n'ha embroccada una... ancoi doveva esser la giornada meio: l'è nuvol!....e che frét! e anca en camera se batte brochete vist che la siora, per far nar for en po' l'odor de carogne che savém, la na fat dormir co la finestra davèrta! De sicur i nosi piani de torla dolza e star qi a ciapar el sol i è bei che saltai: colaziom e gh'è da nar! Ancoi el dur sarà el grant dislivèl de discesa, vist che dai 1800 del rifugio dovém smontar en diga a 250m per po' risalir en paess.... Dopo aver empienù le borracce co l'acqua del rifugio (ufficialmente non potabile, ma... eh eh... la va zò che la se copa!) e firmà el libro del rifugio, ne enviém zò per la forestale e passà for na transumanza dei oltre 100 pegore, aséni e béchi, encrosém en mazèl de zent che sale... i va tuti sul Corno Battisti (ahhhh!!! el traditor!!!!) a far na commemoraziom... arrivai al sassom della pozza en te na quarantina de minuti, ciapém el secont sentér a sinistra per Bocalt. El Togni ormai l'ha finì de lamentarse... quando el torna en val, va a finir che la gamba i ghe la amputa direttamente! El sentér el deventa prest bel ert, l'è en tof dela legna. Cammina, cammina, sta discesa l'è eterna! Dopo n'ora comoda, traversém el rì su na cascata e trovém el sentér serà dai schianti de alberi per valaghe... ne toca tegnirne pù alti sulla forestale, ma per fortuna me vem en dubbio e controllo la cartina: la forestale la ne porta a Pozàcio! Sém fora! E quindi la empontém zò drita per el bosc e ne ritachém al sentér. Altra mezzora comoda de discesa e saltém for sotto la palestra de roccia de Bocalt. L'è ormai le 11, e adess dovém trovar el sentér che taia zò vers Spim. Traversà a pè el paess, e domandà info a na veciòta, continuém su strada fim dopo Vignala e subit prima del cartèl dei Clocchi ecco el sentér! No essendo sentéri SAT, sulla cartina d'altronde i è bem poc segnalai... 10 minuti scarsi de pontéra e sem zà al Spim. E da qi, per nar en diga, bastéria scavalcar la cancellata dell'ASM e entrar en te la galleria che porta sotto all'acquedot.... ma encrosando en meccanico en paess, ne sparmiem anca sta fadiga: gh'è en comot sentér che parte direttamente dalla prima casa del paess, quela co na facciata zalda: 5 minuti e sem en diga... e sona mezdì. Gh'è da mangar, così forse l'è la volta bona che prima dela salita me libero del'ultima boza de Teroldec che l'è tre dì che me tiro drio en tel zaino: mettém fine alle provviste... copém el pam, la luganega e anca el vim. El sol, entant l'è saltà for giust per farne en tort e coserne i zerveleti en te l'ultima salita: scavalchém la cancellada e enfilai drio la ré (gh'è adiritura en cordim passaman che aiuta) saltém sul sentér che costeggià tutta la diga, el se emponta su per el bosc e con 20 minuti de pontèra el ne porta ai 460m del Sich. Adess, basta molar le gambe per i ultimi 100metri de discesa! Ghe sém!!! Ore 13:30, entrata in gloria en paess, tutto è compiuto, e allor adess, brindisi a la cà nova del Kepo (ciamada "Kepo Hutte") a svodarghe el frigo! E no se ghe mete miga tant, vist che en tel giro de mezora som en cantina a attinger alle scorte.. Tra na monada e l'altra 25 boze de birra, 3 de vim e 2 de limoncino le va zò come la bruma al sol... e pianificando la prossima avventura delle pazze, se fa prest le 8 la sera.... ma questa sarà n'altra storia!