SCIALPINISTICA Cevedale del 20/03/2005

Ero resta' d'acordo col Matteo de Pine' de far Zima d'Asta, ma vist el calt che ha fat 'sti di' avem opta' per el Cevedale: almen en quota, la nef l'avria tegnu' en pel de pu'. Dopo la gita del gieri e 'na sera del baldoria, ho punta' la sveglia ale 4 per trovarme col Matteo e Max (so cogna') al piazzale Zuffal alle 5 e tre quarti. Ale 7 e meza erem za a Malga Mare: ma la nef en do ela? Tut entorno prai vegri...e domandando anca al par de scialpinisti che gh'era li', se se consoleva ben poc: questi i proveva a far el canalim del Vioz (ma credeme che da sciar en 'tel canal gh'e' propri poc!). Mes el cor en paze, e i sci sul zaino sem partidi tra qualche macia de nef a pe': e pensar che el bolletino el deva riscio 3: ma de che? de frane de sassi? Dopo boni 40 minuti a pe', dopo aver traversa' la piana che entra en la Val de la Mare, sem finalmente riusidi a meter i sci (quota 2300m.). Le morene de fianc le era pelae, ma en la conca de nef non mancheva. E su! Dopo n'altra mezora de bon pas (ghevo da far le mie a starghe drio al Matteo...forse ero strac dal gieri, forse ero carga' come 'na bestia: m'ero porta' drio picca, ramponi, 60m. de corda, imbrago e moschettoni, per la poca nef fata, no ero sicur enfati che i crepacci i fusa serai) avem encontra' en sciador che 'l n'ha dit che ormai l'era tardi per nar su e l'era masa pericolos vist che i pendii sora i tacheva za a molar: terorista! Si, terorista, vist che n'altro gruppo de scialpinisti encontrai n'ora dopo i n'ha dit de nar tranquili... en realta' en pendio vers i 2800, 'bastanza ert e scalda', aven ben dovest pasarlo su tegnindo el fia', ma po' l'era tuta 'na serie de balze bastanza sicure. Sem quindi saltai sul ghiacciaio e pasa' i primi crepacci: qualcos de davert gh'era ma no serviva embragarse. Sora i 3200 e' pasa' davanti el Max e avem fat 'na tirada fim ai 3575, dove, vist che 'l Matteo 'l gh'eva da esser de volta a ca' per le 4 per laorar (e l'era za' le 1 e meza), avem deciso de fermarne e, dopo l'immancabile brule', tornar de volta. Dislivel total 1575 (194 metri dala zima). La discesa l'e' stada fim ai 3200 su nef sventada, po' fim ai 2800 trasformada (pista!!!!) e sotto marza. Temevem veramente de enfossarne en te la pappa (come n'eva gufa' el terorista la mattina), ma enveze la sciada l'e' sta' propri bona! E cosi', cava' i sci, e camina' n'altra mezora, sem arivai ala macchina e zo de bala a Trent...altroche' ale 4! Ale 5 e 40 sem arivai!




I do scialpinisti Kepo e Matteo, ala piana sora Malga Mare...gh'e' ancor dese minuti da far sci en spalla.


El Max en la val de la Mare... el gh'eva la preoccupaziom de no ciapar masa sol (senno' ghe brusa ala moglie, che l'e' restada a ca' a tender el bocia)...beh no gh'e' sta' problemi...anca se sem tornai zo neri...dopo do' di', dala brustolada, e' vegnu' zo tut e se e' tornai pu' bianchi de prima.


I fianchi dela morena i era scoerti, ma per fortuna la conca l'e' sciabile!


La via de salita vista da sora... la nef no l'e' tanta, ma na volta mesi i sci no serve pu' cavarli e la sciada l'e' garantia!


Termina' la salita soto la Zuffalspitze: se pensevo de eser strac mi che evo dormi' sol 3 ore! no saevo che el Matteo l'eva fini' de far pizze alle 1 e meza e dopo do ore de som l'era vegnu' a far el so prim tremili!...e ale 6 i lo speteva a ca' a 'mpastar de nof! Ma sa avralo tolt zo per far na tiraa del genere? No l'era barrette energetiche, ma biscotti e pinoi!


Zima Zevedal...gh'era l'elicottero del soccorso alpin Trentino, quel zalt, che ronzeva; ma sa ghe fevelo en Alto Adige? Li' dovria eserghe quei rossi! Mah! Pareva che fusa vegnu' zo' 'na slavina sull'Orecchia di lepre...



Ste pagine l'e' stae cargade volte da visitatori dal 3 de agost 2005