SCIALPINISTICA Cresta Azzurra (Orecchia di Lepre) del 11/11/2005

Le previsiom per el weekend, tant per cambiar, no le era dele migliori. Envenze per el vendro el temp nol podeva eser pu’ bel, e cosi’…. gh’è da nar! Me som cosi’ aggrega’ a Davide e Marco che con le ciaspole i eva deciso de far l’Orecchia di Lepre. Mi ghe saria na’ drio coi sci: tanto el centro valanghe de Bolzam el da’ parecchia nef za’ sui 2400… Partim ale 4 e meza da Roveredo ala volta della Val d’Ultimo. Le possibilita’ le è doe: o ala zima ghe nem al vers da S.Gertrude (en font ala val) o da S.Valburga. La prima la ne garantiria de trovar pu’ probabilmente la quota nef bela alta, ma de contro gh’è i oltre 1500 de dislivel… Preferim cosi’ far la salita dalla diga del Lago Quaira sora S.Valburga. Qi el dislivel l’è sol de 1300 e po’ a seconda dele condiziom che troverem ghe narem al vers o dal senter de gresta estif o dalla sciapinistica invernale. L’è le 7 e meza quando parcheggiem sulla strada (che l’era serada da en divieto en fondoval…) che dai impianti di Schwemmalm sale alla diga del lago di Quaira. Da circa 1900m. slm carghem quindi i prosacchi co le ciaspole (e mi anca sci) en spalla e ne enviem en su. Traversem la diga e sulla sinistra idrografica ciapem en canalom che sale vers la vedretta de Pracupola sotto l’Orecchia di lepre. Qi la nef no la manca e de sicur pu’ de quaranta schei ghe n’è…. Peca’ per el fondo: quel propri nol gh’è. Quando Davide e Marco i mete le ciaspole, mi meto su i sci. E per en poc me trovo bem pu’ comot a nar en su….ma propri per poc! El canal el se empenna sempre de pu’ e la nef l’è tut en farinom: ciaspole e sci i sprofonda: oltretut mi devento semo a forza de far zete coi sci en la polver….per fortuna dopo 20 minuti de tribolada ne rampeghem su per dele roccette (senza sci ne’ ciaspole) e saltem for sula piana da en do che taca la vedretta de Pracupola. Da qi podem proseguir o per la scialpinistica, che pero’ pasando a sinistra del ghiacciaio (niente fonda) e esendo anca pu’ erta la promette n’altra bela tribolada, oppure provar a ritacarne alla destra del vallom sul senter de gresta estif che…’l par sgombro dala nef. Avem deciso quest’ultima, e cosi’ mola’ zo sci e ciaspole ne sem enviai vers la gresta…. En realta’ che la nef no la ghe fusa l’era n’illusiom e cosi’ raggiunta la gresta sommitale, propri quando ne saria basta’ traversar quasi en piam vers la zima…. sem restai bloccai dalla gresta: affilada e piena de polverom. El senter estivo qi, deventeva na ferratina….invisibile con tuta la nef che gh’era. Che ciavada! E cosi’ sem tornai sui nosi passi, e passando per la quota massima de 3027m. slm, zima ciamada Cresta Azzurra, ne sem enviai en tel vallom. Tornai en la piana, dopo aver magna’ en bocom ne sem enviai vers val. Sto colp pero’ el Davide e ‘l Marco dele ciaspole i ha fat volentera a men, e mi dopo aver prova’ coi sci (me som empianta’ do volte tra i sassi en sol dese metri de sciada!) me som prest deciso a seguirli a pe’. Saltai en macchina ne enviem…. ma sulla strada (dove la mattina evem vist bem che l’era serada dal divieto) trovem el rullo e l’asfaltador. Domando cosi’ ai operai come pasar e i me diss che i g’ha da spetar el camion pien de asfalto che ariva co l’ultima cota e po’ en tel giro de n’ora i ridaverze! En alternativa i ne dis de risciar a nar zo da na forestale che parte da en bar pu’ a monte. Provem la seconda e dopo en par de chilometri zo per la pista de slittini (co la me Polo!) saltem fora a Schwemmalm… sulla strada de casa. Peca’ per la nef che avem trova’, ma è sta’ propri ‘na bella gita… e l’an che vem la zima la raggiungerem per forza… dala scialpinistica!




Dal Lago Quaira, se costeggia sula destra finche’ quasi en font se scominzia a salir per en vallom (e qi taca la nef)


Salendo, el vallom el se strenze e al centro se vede el canal che porta sulla piana sotto la vedretta.


Sotto la piana en tel canal sempre pu’ ert: Davide e Marco i tribola co le ciaspole en tel polverom de nef… (e anca mi coi sci g’ho da far i numeri per nar envanti)


Dala piana sotto la vedretta (e in vista dela cross de vetta dell’Orecchia di Lepre): la scialpinistica la paseria a sinistra (non visibile) fin en gresta, quindi enzima. La discesa la saria diretta sulla vedretta. Noi qi avem devia’ per el senter estif, salendo dalle roccette a destra dela cross: e l’è propri la’ che avem dovest rinunciar.


Foto di vetta (Davide, Marco, Kepo) sulla Cresta Azzurra: che giornada! En do ele le nuvole?


El percorso de salita vist dala Cresta Azzura: per tornar en val, scavezem a sinistra per le roccette e ne portem al centro dela piana sottostante, da qi ne enfilem en tel canal che ne porta zo sul lago de Quaira, quindi per la strada de servizio dela diga, continuem fim ala machina.



Ste pagine l'e' stae cargade volte da visitatori dal 3 de agost 2005