ALPINISTICA Forcella Marmolada del 17-18/07/2010

Eh, eh, l'era en pèz che co l'Anto' de Milan dovevem trovarne per 'na scarpinada per monti, e vist che sto weekend el vem qi col so CAI (de Oggiono) a pestolar en Marmolada.... gh'è da nar! Parto da Innsbruck alle 7 e 1/2 e per le 9 som al Zuffal Park de Trent a spetàr l pullmin che, tra traffico e autista (beh dai... Schumacher l'è tutt n'altra roba!) l'arriva per le 10 e 1/4. Sém en sedese e tra parlar de zime e barzelette(anca se qualche parola en dialèt strett fago bem fadiga ogni tant a capirla), me fago rento en fretta en tel gruppo. Diaolopo', questi co l'Iphone i è pù envanti de mi: massa comot seguir le precipitaziom che è drio a arrivar da ovest en real time! (col me cell ghe corro drio alle grandinae fotogramma per fotogramma) noi dovresém esser en te nà bot de fèr fin stasera quando però i temporai i dovria passar for per la not. Per mezdì e vinti, finalmente sem a Canazei, e fat scorta en cooperativa de ciope de speck e Radler scarghém i zaini alla partenza della funivia del Ciampac e copà ciope e birra ne enviém a pè su per la strada del Contrin: eheh... i primi 200metri su per la pontèra dele jeep i se fa sentir, po' arrivai alla baita Locia se scaveza via en pian a sinistra e se costeggia el rì en pian per na mezzora. Entant a passo sempre pù svelt ciapo el largo col presidente del CAI a parlar delle normali alpinistiche dele alpi occidentali, quindi, come sempre brusando i tempi delle tabelle SAT, con mezzora de anticipo fém le ultime dò curve e sém al rifugio Contrin giust entant che taca a sgozar... L' è sol le 3! Ne preparém en camera i zaini per la salita de doman e dopo na polsada e n par de birre medie col Ricky e l'Anto nem alla malga drio el rifugio a spazzolarghe la dispensa dalle massa bone torte alla ricotta. N'altra ora de relax su al capitèl sora l rifugio (diaolopo'... tra bandiere 'taliane e corone e targhe, l'è 'na roba vergognosa.... sarà anca el rifugio dei alpini... ma rinnegar la storia 'sì de brutt l'è n po' massa esagerà!) e per le 7 e 1/2 (entant che sui taoli da festa campestre all'esterno gh'è for en gruppo de 10 veci zà embriaghi come le zorle) ne trém rento per zena. Diaolopo'... che magnada! Canederli, polenta fonghi e cavriol, strudel e de sto pass la Marmolada per parar zò tutt doman ne toccherà farla dò volte! En Braulio per digerir e per le 10, quando i temporai i è ancor lontani nem en camera a trar zò i ossi: la sveglia doman l'è alle 4 e 3/4! Sona la sveglia, ne vestìm de balla e... diaolopò... diluvia! Beh... nem istess a far colaziom, che magari entant el zede n'attimo de piover, ma ... niente... diaolopo'... tornem en lèt spetando le 7 ... po' le 8 .... po' le 9... po' ... gh'è da nar! Se ciava se piove... en qualche modo ne tocca nar ... anca se la voia tra nebbioni e acqua l'è propri sotto le sole dele scarpe! Alle 10 finalmente el mòla de piover e ne enviém su per le erte zete vers la Forcella Marmolada. El cartèl el la dà a dò ore e 40... ma come sempre... corrém come le bestie... somenem de brutt el gruppom del CAI de vicentini, quindi passà for el limite dell'erba, arrivém ai geroni senza na pausa e adiritttua, come no fussa assà erte le zete, la mpontem dritta per almen 50 metri. Po', sulle ultime zete (che da erte che le è le è tegnue su da bore de péz) avanti a testa bassa e en te n'ora e 40 dal rifugio sém alla forcella (limite delle nebbie... diaolopo'... pù sora, propri adess che entrerem en ferrata, no se vederà pù nient!) a trar su imbrago, longe, guanti, casco e passamontagna. Gh'è en vent che basta la metà, e col fret che è vegnù for, guanti o manopole, ne embrumen tutti en pressia le man. El prim gruppo de 6 el s'è zà envià su per la ferrata, ma viste le pessime condiziom meteo, col Marco, l'organizzator dela gita, se decide che l'è inutile strozegarse su per la ferrata... anca le roste le è viscide per l'acqua: no ne perdém propri nient, e allor, puntém a sbasarne en ferrata su lato opposto della forcella vers el Fedaia. Giust per sicurezza, anca se par tutt tranquil na volta smontai sul ghiacciaio (che fém senza ramponi e sol picca alla man) fém dò cordate e n te n'ora de discesa traversém sotto i 2 speroni che vém zò da Punta Penìa, quindi risalì altri 200 metri en tutt arrivém prima al Rifugio Pian dei Fiacconi, quindi al ristorante sora, propri ai pei del ghiacciaio. Berg Heil! E adess dopo na bona birraccia media (e entant che arriva anca l'altro gruppo dala zima: no i ha praticamente vist a en palmo dal nass), ne molém zò a tor i bidonzini che per le 4 ne porta al Passo Fedaia. Eh eh, e adess, dopo en bon "zum Wohl" co l'Anto' per el bombardim de fondoval, ne trém en pullman e con tutta calma (sempre per via de Schumacher...) ne enviém vers cà... zà col pensier a la prossima: gh'è sempre da nar!




Ne enviém su de bona lena per i erti 200m de dislivèl che ne porta a baita Locia...


..quindi traversà la piana, con altre dò pontère sem al Contrin (me sparmio le foto del rifugio: bel, ma... con massa bandiere di parte)


La mattina dopo, sotto le ultime goze de pioggia, se svoda de balla el rifugio e se se trova en marcia en 35...


...ma col nos pass bel spedì, somenem prest i altri gruppi... e a testa bassa continuém a guadagnar quota...


...puntando ale nebbie oltre el limite dela vegetaziom...


..e quindi direttamente en forcella endò che ne embraghém e vist el temp infame...


...decidém de smontar direttamente sul versante opposto senza passar dalla vetta...


....sulle placconae bele umide gh'è da star all'ocio a no slipegar...


...quindi.... en te n'attimo smontém sul ghiacciaio...


....e con mi e Marco da Kepocordata smontém dal ghiacciaio...


..dopo n'ora dalla forcella, l'è ora de fermarne n'attimo per trar imbraghi e corde en tel zaino (a veder via el Piz Boè en mèz ale nuvole, g'avém conferma de aver fat bem a scavezar zò diretti senza passar dala zima)...


...passà quindi via i dò costoloni de roccia (che divide le vedrette dal ghiacciaio principale della Marmolada), risalim en direziom del Pian dei Fiacconi...


... e oltre, vers el rifugio a pei del ghiacciaio per beverne la meritata birra!


...e adess via de bala a tor i bidonzini, che el rientro en pullman l'è lonc!



Ste pagine l'e' stae cargade volte da visitatori dal 3 de agost 2005