SCIALPINISTICA K2 (A) del 24/03/2010

Envià via la moca zà preparada al sera dal Teo e per le 5 e 40, dopo en colp de sternùt che me encricca el col per na stimana, saltém en macchina a tor el Davide all'area de servizio del ponte Europa, quindi, dopo n'altra bona colaziom de brioches e caffè, ne fiondém vers Ovest: Telfs, Arzl e quindi rento entont alla Pitztal fim a Mandarfen. Ancoi nem sul K2!!! Alle 7 e 35 sém lì che tirém zò i assotti dalla Polo, entant che zerco de capir a che ora daverze i impianti (che ne permetteria de sveltir la gita a sol 1000 metri, e trovar firnaccio en discesa, dato el calt previst ancoi). Diaolopo'... altrochè galine! Qi i è en letargo come i orsi! I daverze ale 9! E alor, tant val enviarse su a pe'! Sfruttem la discesa scialpinistica a destra dei impianti che saltando su tra 2 imponenti slavine (non per nient i l'ha serada) la ne sbara su en te n'ora propri dei 600 metri che ne avria scortà i impianti: fortunamente el rigelo notturno el gh'e' stà alla grande e la nef la porta alla grande. El Teo per velocizzar la salita el la mponta dritta senza sci su per la slavina, mi, vago de zete sull'ert versante sinistro, el Davide el resta pù centrale e vers le 9 arrivém così al Rifflsee ensieme ai altri scialpinsiti che pero' sfrutta i impianti. Se perde 50 metri de quota, e traversà la piana de pista da fondo (co la grosta de giàz che per n'attimo, soffiando, la ne fa pensar de finir en tel lac) el Teo el ciapa el passo gara su per la val per nar a domandarghe al veciòt col caign la direziom del K2: pecà che en todesc no te poi domandarghe "kappa due"! E quindi per fortuna el rallenta n'attimo a spetarne. No l'è ancor le 10 e zà l'è un calt atroce... Arrivai ai 2400 gh'è el bivio per Wurmspitz (dritti en fondoval) e a destra su per n'evidente canal per el Rostizkogel e K2: la nossa zima la ne appare propri davanti entrà i canai che salta su... ciapém quota e raggiungém en par de putéi anca che i punta alla zima pù alta (el Rostizkogel) ma tra el sol che l spacca le pree, la sé da paura e l Teo che l tegn en ritmo da gara, no ghe la fago a tegnir el pass e no vedo l'ora che l Davide el se ferma a fumarse en zigheret, che almen rieso a tirar en po' el fià! Enveze, niente! Anca se ormai propri per el massa calt no g'ho pù el pass e rallentém sempre de pù. Po', col Teo che se mete drio a stizarme pestolandome le còe e fasendome pensar alla bona birraccia de fine gita, deventa na battaglia tra mi e mi per no zeder. Finalmente arrivai alla piana glaciale, la temperatura l'è pù fresca e puntém all'evidente lengua davanti (saltando dritti enfont a destra sora i seracchi se naria enveze sul RostizKogel). Ormai sem a 2900m, el K2 l'è el triangolom bianc che svetta lontam enfont al ghiacciaio... ma dai... l'è sol 300metri! (anca se no so quanti Kilometri!) Propri entant che saltém sulla balza che ne porta en tel vallòm glaciale, ne raggiunge en veciòt e fate quatro ciacere col Teo visti i 17 gradi attuali, vem voia de girarse. Quando el sol el tramonta i aséni i se mponta e allor, a sto punto som mi che butto per proseguir... ma saltai sulla piana, con sotto en zoccol da paura, nem envanti demo' 5 minuti e, a quota 3000, vardà l'oroloi (le 11 e 1/4) e l'enorme svilupo che ne spetta, l'è giusta cavar le pèl... Dai... no sarém arrivai enzima al K2, ma al Campo Alto, sì ! Neanca el temp de cavar le pèl e me se materializza davanti el sogno de ogni scialpinista dopo ore de fadiga: el Teo el tira for dal zaino na bozza da litro de birra pastorizzada....e bela fresca!!! Che spettacoloooooo!!! Berg Heil e ... Prost! Diaolopo', da no creder... ecco perché el m'eva fat deventar mat a vegnir en su ... fasendome pensar alla birra!!! MAssa giust! El Davide el ghe accompagna en zigheret, e quindi l'è ora de molarla vers val: sulla piana glaciale fim ai canai l'è na bella serpentina de 5 schèi de polver su fondo duro, po' firnaccio zo' e zo'. Sbasandone en tei canai, però gh'è da star all'ocio a zercar i tochi erti e men solivi, che sennoò se sfonda de brutto. Arrivai en te la piana, gran skettinada ver l'altra sponda del Riflsee e saltém su alla malga de arrivo funivia. Wurst mit Senf und Brot, Radler... und null Sterne! (na... localaccio da 0 stelle... massa commerciale), ma la luzia e la sé l'era tanta! Per mezdì e mèz, quindi, sfruttando le piste (non el skiroute della mattina, che sarìa massa pericolos! oltre che serà per Lawinengefahr!), en ten pappom da foc saltém ai 1600m della macchina. Trati su asoti e scarponi, per le 1 sém lì che partìm per el WelschTirol: el Teo per le 4 el deve esser en Piné col grombial a mpastar pizze...e la vecia Polo coi so 331.000Km, no la perde mai en colp...




Se la mponta subit dritta su per el Skiroute che smonta a Mandarfen: gh'è sotto el cartèl che l'è serà...


..per valanga! E quindi, anima en paze e su per 600metri a ravanar de zete...


...finchè saltém fora al RifflSee.


Traversà el lac risalim el vallom 200 metri de dislivel, quindi...


...co na deviaziom a destra ne enfilém su per canai raccordai, continuando a ciapar quota...


...fim alla piana glaciale: el K2 l'è el triangol de nef a sinistra.


Quattro erte zete per saltar sul ghiacciaio e... diaolopo'... l'è 17 gradi!!


manca sol dosénto metri, ma el sviluppo l'è ancor tant... e el zòcol.. ancor de pù!


...e allor, per no risciar, meio goderse el firn! Dai... no sarém en zima al K2, ma al Campo Alto sì! Zò le pèl e...


Prost!!! Ahaha... che lusso!!! la birra pastorizzada fresca dopo na sfadigada del genere!!! La va diretta en tel sangue!



Ste pagine l'e' stae cargade volte da visitatori dal 3 de agost 2005