SCIALPINISTICA Lüsener Fernerkogel (A) del 10/05/2008

Le fonti del Mich le dà polver e firn en UltenTal, ma dovém bem spetàr vendro pomeriggio per scioglier la prognosi meteo: e quando i dà instabilità a sud della gresta de confim e bel a nord.... sa volè, nar a zercar brutt temp? Na,na! Gh'è da nar... en Austria! Sto colp tra che l'Albert l'è de cresima e l Luca sempre col Tano, sem demò mi e l Mich. Ne sarìa bem piasèst trarne rento per la Stubaital vers el Schrankkogel, ma tra slavine che ha bloccà la strada, tra che l rifugio l'ha serà domenega, nem sul sicur: tornem en Lüsental! Prenotà al Gasthof del parcheggio, ne trovèm alle 4 a Calliam e dopo la solita colaziom a Brixen, per le 6 e 40 sem al parcheggio (quota 1640m) a tirarne a um e cargar i sci sulla schena: come sempre sem l'unica macchina taliana. Sem drio a enviarne che taca a sonar la campana: ma sa averente prenotà? En Gasthof o en convent? De zent en partenza ghe n'è tanta e a ocio par quasi che i vegna tuti a far la nosa zima, che l'è anca la pù alta e famosa dela val. Caminà en quart d'ora, praticamente en piano, arrivai alla testata della val podém subit trar i assotti sotto i pei e tacar a guadagnar metri. Passà en par de vecioti, affianchém altri doi che subit monta i rampant: l'è engiazada e propri el prim toc, l'è bel ert! No gh'è da slipegar! Mi tribolo n'attimo ma dei rampant fago a men, el Mich enveze el ciapa el largo e l me distacca subit de en zentinar de metri e l continua la risalita ciacerando con en so socio de Kitzbuhel... Passà for i 200 metri de ontani e altri 600 de dossi bei erti, arrivem al sol e finalmente l'è ora de na prima pausa. Se l'esposiziom del pendio l'è a Sud-Est, e po' sora sul ghiacciaio sem a sud secco, no gh'è tant da fermarse a polsar! El sol el cose la nef a vista d'cchio! Giust el temp de trar su i ociai e la crema protettiva e via che ripartim de bom pass. L'è ormai le 9 che saltem sul ghiacciaio e con na curva a destra ne enfilem en tel vallom che porteria vers el Lisenser Spitze (a sinistra): n'altra bela zima pu' fazile e sciabile dela nosa... a vardar a destra enveze ghe en grestom de 300 metri che porta alla nosa... mm...diaolopo'! Ok, g'avem drio tut quel che serve, ma restar sul fazile (Lisenser Spitze) no me spiaseria e così co la scusa che la nef l'è zà cotta assà per la discesa, ghe propongo al Mich de nar su questa... Ma el Mich el me conosse bem (el sa che l'è sol perchè voi far el comot) e infatti con en: "No ho miga portà su la corda per nient!" el me fa capir che el programma no sel cambia. Ne trèm così sui pendii de destra e con 4 belle zete sul giazà guadagnem quota vers le roccie. Da qi, pensevo quasi de dover scominziar a rampegar, e enveze le traccie le fa en travers endrio per saltar for da en pass su n'altro pendio de nef en esposiziom sud: e la nef mola sotto i pei se la sente bem! Altri 50 metri de pendio e a n'altro passòt, superem en putèl e arrivèm en te la conca che finalmente la se sèra e la porta alle roccie de gresta finale. El strac el se fa ben sentir, ma molà zo i sci, ghe domando al scialpinista come che le è le condiziom dela gresta: ottime! L'è fazile e no serve corda, el me diss! Oro, e allor, giust per sicurezza co la picca en man, tachèm a rampegar vers la zima. La nef la facilita la rampegada e comunque anca endo che gh'è roccia gh'è manettoni comodi da tirarse su.... Ore 10 e 20.... Berg Heil! Propri bel zimon! Sem su en 5 persone e do Husky (diaolopo', sti cagni che rote i coioni e vol passar davanti entant che se rampega su per le roccette!). Na firmada al GipfelBuch (eh,eh!!! Sto colp i Grusse ghe i scrivo bem en todesc!) quattro dritte da n sior per localizzar le zime pù famose della Stubaital (lì drio) e l'è prest ora de trarne zo dalle rocce. Caccià i sci sotto i pei e saludà con en "Viel Spaß" i do skialp de IBK e Graz alla base, ne trèm a zercar firnaccio! Ghe sarìa la possibilità con nef strassestata de far la discesa direttissima, ma a sud el sol l'ha zà scaldà massa e quindi tornem dal ghiacciaio e.... fem bem! Qi quattro belle spazzolae de firn le fem subit! Po', se se fionda vers val per i 1000 metri de pendio dirett, zercando le esposiziom endo che el sol l'ha zà còt, ma no massa! En la parte bassa, anca se l'è ormai le 11 e 1/2, no se sfonda e riusim a portar i sci comodamente fim alla sterrata de val. E quindi solito quart d'ora a pe' e per mezdì sem zà al parcheggio a cavar i scarponi. Lì gh'è na siora tuta entusiasta per la sciada appena fatta: ela la torna dal SeeblasKogel, n'altro zimon lì de fianc: superfirn la ne diss... "ma se la fè, partì mezora prima de ancoi, che l'è ancor meio!". Ela la la rifaria anca doman, ma ricordandone che l'è la festa dela mamma ghe toca star a cà: de zerto la se rifarà luni, vist che qi l'è festivo (l'è el PfingWochenEnde!). A noi, pero' entant la n'ha dat en bom spunto per doman! Tolta al volo la camera e trati zo i zaini ne fiondèm così en terrazza a magnar e bever. En par de ore de polsada e per le 4 decidèm de trarne en val a vardar quant che vem i sci qi a Innsbruck. A IBK West vedém for dall'autostrada en bel centro comm sportivo.... ma sol per girarse, tra sensi unici e tonde che no gh'è arrivèm lì alle 5 en punto: giust en temp per farne seràr la porta sul muss: diaolokan! Qi i sèra alle 5! (A parte i supermercati.... almen i sali minerali arrivèm a torli!). Non contenti nem en centro a zercar en negozio... forse i tegn davèrt de pù! Enveze parcheggià alla staziom dei treni, vedèm bem che qi ì è zà de festa... vabbè.... torném così en Lüsental per la zena, e a studiar sa far doman! Me rincora saer che al de là dela gresta de confim è drio a vegnir zo el finimondo de temporal: Kepo!!! No ten sbagli una! Ne trèm così en sala da pranzo con libri e cartine per el consulto de doman (eh,eh! Doman ne toca propri fa i "Firn Jäger"=cazadori de firn! nem sul SeeblasKogel a far altri 1600 de dislivel!) e con en litrozzo de birra l'oste el taca a portarne la zena. Dopo en canederlo gigante en brodo e la salata, el ne porta na codima de pasta con zo de tutt! L'è i nudel... ma l'è propri dura trarla zo tutta! Mi abbandono a metà! El Mich, envenze, onore al merito el ghe la fa!!! mmm.... beh, dai, el se tegn come en gardelim tuta la stimana.... el pol anca magnar en po' de pu' al weekend! Ma sul pu' bel, quando pensém de aver finì n'arriva anca n'ultima mattonada de torta de ricotta! Per parar zo tutt, e vist che sem ormai en confidenza (co l'oste che ne parla en taliam e noi en todesc) el ne offre anca na grappa bianca, quindi saludà i altri commensali (e le siore che le zerca anca de tacar bottom parlando n taliam!) nem a trarne zo.... ma la presenza dei me scarponi en camera l'è propri na bomba biologica: me toca serarli for dalla finestra! La sveglia la cacciém alle 5 e per le 9 e 1/4, sém zà drio a ronchezàr.




Ecco la nosa zima de ancoi! Ma come cavolo farente a narghe al vers su per quei scrozi? Eh,eh! La salita l'e' tutta a sinistra per i erti pendii fim sul ghiacciaio! (Foto di repertorio del 13 aprile scorso...)


Avanti quindi su per erti pendii! E davanti el Mich, col so socio de Kitz, el m'ha za' dat zo' en zentinar de metri!


Adess el pensier l'e' farghe el giro entorno al sto scroz sulla destra.


Quindi avanti a testa bassa e...


...drio el scroz che sem drio a aggirar salta for la nosa meta!!! Ma besogn torla larga! E cosi'...


...prima se salta sul ghiacciaio (a sinistra, la fazile zima del Lüsener Spitze)... po' se devia sul versante destro e...


con en bel travers s'ha bel che aggira' el scroz...


... e finalmente davanti ne compare la nosa zima! Quindi puntem al passot a sinistra e....


...avanti de roccette!


Berg Heil! Eh,eh, Kepo! El Mich el t'ha tira' el col anca sto colp, eh?!


E quindi, tornai sul ghiacciaio basta molarla vers val!



Ste pagine l'e' stae cargade volte da visitatori dal 3 de agost 2005