SCIALPINISTICA Sulden Spitze/Cima Solda del 13/11/2010

El cont en sospeso da sabo passà el va saldà en fretta: en Trentim gh'è da portar ancor i sci en schena, ma a Solda sci ai pei dall'auto, la stagiom l'è partia alla grande! E allor ancoi l'è la volta bona che fem la SuldenSpitze: la zima che la stimana passada, pur se affollada, evem evità perchè erem senza arva e pala. Partìm alle 6 da Roveredo e per le 8 e 1/4 sém a Solda a far colaziom con en bom brulè, quindi, sci ai pei e ne enfilem su per la jeepabile che entra en tel vallom. Ancoi de zent co le pel ghe n'è a uff... El temp l'è ventos en quota e le veladure alte le esalta el fresc, e così dopo n'ora e 1/4 a testa bassa (fasendo la stessa salita dela stimana pasada) arrivém al rifugio Milano...e chi, vist che no l'è tardi, molém zo' i assotti e ne trém al ristorante della funivia a beverne na bona birraccia media. I primi 700m de dislivel i avem magnai... sem zà a metà... adess, dopo 20 minuti de pausa, basta farse coraggio e trarse rento per el vallom tra i ghirli de nef e far i ultimi 750... lonc travers per saltar enfont al vallom e arrivém a mpontarla con na "esse" da sinistra a destra su per el ghiacciaio. Trém su anca el passamontagna, e puntém al prim doss de giaz vers destra. Man man che ciapém quota se calma anca el vent, e a parte en par de tutine, quei che sorpassa i altri, sem noi! Al secondo doss, en po' de spegazi a star fuori traccia, vist che le pèl no le tegn, e comunque sempre n'ocio de riguardo ai crepi, vist che en skialp en discesa, el g'ha sfondà zò co le coe... Altro dossom de giaz e ecco la terminale, bela daverta, ma con en bel larc pont de nef che se la passa for senza scorzerze. Adess sém alla conca sotto la zima e puntando a destra al passot, con quattro zete saltém en gresta e da qi tutt a sinistra, quindi 4 zete de numer e Berg Heil! E da qi se vede le traccie de discesa vers el Cevedale (zà traccià da stà banda), e dalla banda opposta i pendii ancor vergini del Gran Zebrù (e ghe mancheria i fussa zà tracciai!!). Na vintina de minuti de pausa (en vetta me digo che sarem 20-25 persone), zò le pèl e... gh'è da nar a divertirse! Tornai alla gresta, enveze che puntar al passot, la mpontém dritta vers i dossoni e.... bela sciada! La nef en po' ventada, la se fa domar senza tante preghiere...e anzi... la preghiera, passà for la terminale e l prim dossom de giàz, ne fermen bem noi a farla alla Trinità che g'avem davanti! Saltai for dal ghiacciaio, en la piana, ne passa via en vecio local con en cagn pù grant de elo, tacà drio en tel zaino co le zate drio a sbrindolom: massa giust! E girandose vers de noi el ne ziga "Auf und Stauf!!!" e n tirolerisch el ne spiega come migliorar la sciada e... l controlla bem che la migliorente! Zerco bem de giustificarme del rispett che g'ho per via della spalla che ho giust giustà, ma alla fim, ghe nem drio e smontém ensema a n gruppom de dese sudtiroler, prima su lizera grosta, ma ciapà la pista, no ghe n'è pù per nessuni e n dese minuti sém zà zò tuti al parcheggio. Adess che l'è mezdì, quindi en bom taglier e birra al bar di fronte ai impianti (adess frequentà sol da skialp) nel sém meritai alla grande! E po' tolt su la Polo, zà se pensa alla prossima sciada de doman... l'Andrea el s'è brusà el weekend per nar en Marmolada co l'Omar a mparar a sciar, el Kepo, enveze... probabilmente el narà en direziom Tonale/val de Non: sempre en zerca dela super pulver!




Se risale le piste e se devia a destra...


...per enfilarse rento per el vallom..


...quindi se ciapa quota per saltar sul ghiacciaio..


...e scavezar via oltre i seracchi, sora la terminale...


..e dopo la veloce dorsale, en vetta: Berg Heil alpinisti!


E nel rientro, come no se pol fermarse?? Ecco i pellegrini en adoraziom della Trinità: Gran Zebrù, monte Zebrù e Ortles!



Ste pagine l'e' stae cargade volte da visitatori dal 3 de agost 2005