HOCHPLATT SPITZE m.2546 disl. 1050m
Le previsiom per el weekend no l'è nient de bel, ma 2 dì serai su no se pol miga star e così ne organizzem per farne el weekend en gresta de confim. La sera starem a dormir en canonega en val de Fleres, endo che (en te l'albergo sora) dalle 4 dopodisnar taca anca la festa dello scialpinista. Ne trovem così alle 7 a Calliam mi el Mich e l'Alberto e ne enviem vers la gresta de confim. Ancoi sem scialpinisti de ricerca: nem a far na gita che no se trova su nessuna guida e el Mich el l'ha notada sol sulla cartina della Tabacco.... dalle foto che gh'evem fat dalla zima del Tempo, par en bel sciadom, a parte la pala finale che veramente no so come farem a passar su. La zima l'è l'Hochplatt Spitze en "Jufentol" (come diss i sudtirolesi). Raggiungem Casupola (paess de partenza) e per le 9 men dese sem za lì che ne enviem su per la val. G'avem davanti sol en local che vedem l'è drio a farne traccia su per el prim canal che sale su na prima piana subit sotto el passo Giovo. El temp l'è ancor alt, ma viste le previsiom l'è meio no torla massa dolza, vist che no conosem la zona e de traccià no gh'è nient. Arivai sulla piana, 250metri sora la macchina, deviem a sinistra e aggirà en doss da destra entrem en te n'anfiteatro dominà davanti propri dalla nosa zima. El local che feva traccia, el devia a destra quasi subit per na forcella, e el se stupiss quando ghe spieghem endo che volem nar. La pala finale per narghe al vers da sinistra l'è bela erta e col rischio tre l'è massa pericolosa. Da destra però, par che ghe sia en strett canal che pol portarne su. E allora messi i rampant (sol mi) ne portem sotto le rocce endo che parte el canal. Molém zo i sci e, diaolopò, picca e ramponi i ho lasai en macchina.... beh, sto colp nem istess. El Mich el se enfila su per prim e dopo 5 minuti de suspance (e con i ultimi 10 metri de canal bei erti e giazai) saltem for al pass 30 metri sotto la zima. Da qi tachém a risalir la gresta su placche giazae (fazile, ma se l'è en condiziom! Ancoi no!). Taca a fiocar e ghe sem. Berg Heil! Firmo el libro de vetta e fata na foto scominziem a tornar de volta per la gresta e el canalim. Rimessi su i sci, è bastà smontar de 100 metri dal toc sventà dela pala che avem trovà en polverom da foc. De lusso! Co l'Alberto che adess, a forza de allenarse el riese a far le zete anca en discesa. L'è le una che sem alla macchina, ne par brutt nar en albergo adess.... de scialpinismo se pol farne ancora!
FLECKNER m.2331 disl. 950m
E così senza neanca cavarne i scarponi (a parte el Mich che el guida) ne fiondem en val Ratchines a far na gita collaudada: el Fleckner. Parcheggià a en slargo da endo che parte la forestale, ne enviem vers le 1 e 3/4. Tegno el pass mi, e no vago piam. La forestale l'è propri longa e dopo na bona mezzora taià en su per en senter a sinistra arivem a delle malghe (Kaserlicht Alm) sotto na zima (che no l'è la nossa). Al Mich e all'Alberto, per el calt che l'è, ghe s'è fat sotto en zoccol da paura: e mi enveze vedo che el silicone spray che evo trat sotto per el Sellaronda el funziona alla grande. Girém a destra e traversà en toc de bosc, dopo na longa (e che longa!) piana arrivem a na malga (Innere Wumbiss Alm). Da qui finalmente se vede la zima ma l'è zo lontana enfont alla val! Passa davanti el Mich e se va ancor pù spediti. No arivo quasi a fermarme a bever, ma el temp el butta al brutt.... gh'è da nar! Entrai en tel vallom, finalmente manca pochi metri alla zima. ....e dopo quasi ormai 2000 metri de dislivell me vem la prima crisi de fam: no i me fa fermar! Avanti! Finalmente ghe sem (Fleckner 2331m.), fioca fiss. Magnem qualcoss e senza visibilità ne enviem en zo. No se vede nient i primi 500 metri, ma po', tornai alla malga, se sciariss e en tel bosc, a dribblar piante e saltar en tel polverom ne la godem propri! Saltai sulla provinciale, la costeggiem altri 500 metri vers val (coi sci endoss e i autisti che i se meraviglia vederne sciar fianco asfalto) fim alla macchina: l'è le quattro!
DIE LONGE TOUR: RADUNO SCIALPINISTICO
Taca la festa del scialpinista all'albergo Panorama (quel sora la canonega)! Adess podem nar en val de Fleres a beverne na birra, anca doe.... entrando en la val encrosem la finanza che i ha giust parà for dala val: se no i porta fora en fretta i cagni antivalanga stasera fem bistecche! Entrem en tel locale e gh'è na compagnia de scialpinisti (tuti en uniforme co la T-shirt "Die Longe Tour") che beve e canta ensema a en duo live co chitarra e fisarmonica. Appena ordinà na ciopa col Speck e la seconda birra media, i ne dà la divisa anca a noi e capìm sa che vol dir "Die Longe Tour": non tant el gran giro coi sci, ma de birre! E allora co la luzia che g'avem ordinem anca en taglier con altre 2 birre medie.... Dopo en par de litri de birra ne rendem cont che la festa la gira propri bem e con na veloce trattativa disdicem la prenotaziom al canonega per la not: starem en te sto albergo che con meza pensiom el ne fa 40 Euri. Entant che el Mich e l'Albert i copa la quarta Weizen da 0,5l, mi me tiro envanti con n'altra media (ogni 4 Weizen da 0,5l mi devo tor 5 medie da 0,4l: el calcolo nol fa na piega!) e man man scominziem a conoser zent: sem i unici che parla italian, ma forse, per come i vedeva che ghe nevem drio ai còri, no se n'è rendui cont tutti. Dall'altra banda dela sala i taca a far volar anca i lampadari e noi no restem endrio. Avem conosù na putela de Caldaro: e anca se g'ho blatterà su en todesc la prima roba che la m'ha domandà è stà: "sei italiano?" e mi: "no, no! Trentim!" (entant che el gal el canteva per la terza volta...). Po' s'è sentà al nos taol el Franz e quando el n'ha offert en tiro de pipa (se pol fumar en tei locali?...basta che no sia zighereti! tanto ormai i finanzieri i è lontani....) zà che sem bei carburai me compro anca en pakèt de Marlborini. Zà bei ncierinai, vers le 7, ne fem dar le ciavi dela camera tripla, trem zo i zaini e butà i scarponi en caldaia (diaolopo' ghe tocherà ariezarla 3 dì!) nem diretti en sala da pranzo. Beh, anca se bona, la quantità l'è scarsa, ma tanto erem zà tesi dalle ciope e l taglier.... magnem tagliatelle ai fonghi, do bistecche alla piastra e patatine e per el dolz no gh'è pù spazio. Parlandoghe en inglés al camerier (l'è en lòcal, ma nol sa na parola de taliam) riusim a barattar el dolz co na sgnappa bianca. E ne toca beverla de resta perchè fora ormai se sente che el festom l'è propri bel: tornem en tel locale del bar e gh'è le putèle che balla en sala al ritmo de fisarmoniche e chitarre sonae da tre putei che è saltà sui taoli. Tra en zigheret e na birra el temp el vola, e l'Alberto trovà na spina della birra daverta sul furgonzim davanti al locale el ne fa el pieno a tutti. Tra en zigheret e na grappa bianca, conosem propri tutti: e tanti i ne riconoss dalle molte volte che i n'ha vist su per ste zime della val de Fleres! L'Alberto, po' dopo la sesta grappa el taca a parlar el todesc meio del dialèt e allora zo tutti che ne domanda endo che sem nai ancoi (la "Jufentol" anca se qua de drio nol la conoss quasi nessuni! Con stà zima proprosta dal Mich sem propri deventai scialpinisti de ricerca! Con l'Hochplatt anca l'ultimo segreto dell'Alto Adige l'è stà svelà e infatti, quel che l l'ha pubblicada sulla cartina della Tabacco... i l'ha copà!) e ne scolta come dei veri guru de scialp. Tornai rento, dopo quattro salti sui taoli e altre 2/3 grappe, el Mich el conoss anca el pastor de Stein (l'è nà la stimana pasada a far la parete Bianca!), pò ne lancièm sulle putèle e senza mai postar zo el bicier ne metem a sonarghe la chitarra.... quando l'Albert l'è stracarburà el ghe rifila zo anca en grappim en te la birra media che el Mich l'è drio a offrirghe al Franz. Ma sti todeschi, de misiotti i ghen sà bem e infatti l Franz l se n'ascorze subit e l ne la ridà endrio: ne la bevem noi! Dopo le 3 e meza el locale el taca a sfoltirse, e l'Alberto vers le quattro el corre vers la camera (...e no l'ariva) per problemi de digestiom che a so dir g'ha dat el caffè della zena! Restem zo mi e l Mich e n'altra quindesina de persone e così dopo n'altra resta de n grappim passem alla birra piccola: ma el Mich el deve esser propri carburà: dopo na meza resta, per scherzar, el me la trà en faccia (diaolopo' se la bèca la birra en tei oci!) e mi col so consenso ghe la rendo zo per la maia (...e le braghe: me sa che el me bicier l'era ancor bel piem, vist che la matina dopo l'era ancor miz quasi da pensar d'essersela fata adoss!). Ne trem for per n'altro zigheret e a locàl quasi vot, raccatem n'ultima birra da portar en camera. L'Albert el dorme zà fiss, bevem la birra sul pontesèl (el Mich nol ghe la fa a finirla, el sen porta meza sul comodim: magari ghe vem sè for per la not!), n'ultim zigheret e dopo aver puntà la sveglia dopo 3 ore (diaolopo', anca l'ora legale gh'è de mez stanot!) butém zo i ossi. La sveglia-concerto del Kepo la parte alle 7 e meza e subit ghe sona anca el cellulare: dovevem trovarne alle 8 e meza a Vipiteno col Luca C. e l so socio Gervasio. I ne diss che i s'è ciapai bonora e i è zà a Vipiten! I fem spetar al bar: ne levem de bala tutti con en zercio alla testa ma: mai zeder! Gh'è da nar! Butem i zaini en macchina, paghèm (80Euro a testa: ma gh'è rento anca pù de mezi alcolici! E sto colp, almen mi con 4,2 litri de birra e 10 grappe bianche ho fat el record assoluto!) e ne trem en sala da pranzo a far colaziom. Gh'è lì anca tre gruppi de scialpinisti che s'era fermà lì alla festa: i è tutti sconvolti e i ne varda meravigliai quando ghe disèm che sem drio a nar a smaltirla en val Ridanna. No so el Mich come l'ha fat a guidar. Uscendo dalla val de Fleres encontrem ancora la finanza che la rientra: adess che i festeggiamenti i è terminai i pol ben riportar i cagni antivalanga sani e salvi!
ZWISL m.2167 disl. 800m
Ne trovem alle 8 e 1/4 al bar della tonda de Vipiteno e parcheggiem la macchina subit sora al skilift en val Ridanna: ancoi ne pol bem bastar l'Einacht Spitze con 850 de dislivell. Pellém e nem. El passo lento costante ma no se se ferma! Taià su per el bosc, arrivem alla forestale: anca dopo n'ocio alla cartina ne rendèm cont che la salita alla nosa zima la doveva passar pù a destra. E così, vist che sem sulla salita per el Zwisl (che avem zà fat vinti dì fa col Bertold e l Paolo) decidem de rifar el Zwisl. Pasà così la Wurzer Alm tachèm a ciapar quota vers el dossom e ne rendem cont de aver scelto bem anca sto colp: la zima a destra che dovevem far l'è straaffolada, qui enveze sem sol noi. Arrivem su che no l'è ancor le 11, pecà sol che el seren che gh'era el s'è offuscà con qualche nuvola e el prim toc de discesa fim alla malga dovem farlo en po' alla cieca. Ma po' quando se torna en tel bosc, gh'è da goderse! Anca i riflessi i se riprende (se no volem centrar qualche pianta....) e con quattro bei slalom en polver ne fiondem a val. Propri n'altra bela sciada: soprattutto utile per ripigliarse... El Luca C. e l Gervasio i se envia zo de bala, noi enveze no podém saltar el rito della locanda all'inizio della val Ridanna. Beh, sto colp i avem sorpresi: 3 acque minerali medie! ....e mi na ciopa col Speck per sugar su: g'ho en po' de acidità de stomec....