GARA SCIALPINISTICA Bellamonte del 30/01/2008

Sto colp l'è la volta della gara che me spaventa de pù en te la serie del trofeo 4 valli. Ancoi infatti oltre alla salita, gh'è anca la discesa a porte direzionali! Ma sa elo le porte direzionali? Tra porte e bandierine en te le varie gare de sci alpino che se vede en TV, no ghen capisso propri la differenza.... figurarse adess che me toca molarme en zo mi! Vederem sa che vem for! Ne trovèm alle 5 e 1/4 al Zuffo e via de bala col furgom del Max per la val de Fiemme! Entant è vegnù for anca l'ordine de partenza: primo el Teo alle 7 e 40, po' dopo en quart d'ora el Caio e quindi el Max. Mi che parto alle 8 e 40 ho ben capì che quando arriverò al traguardo i troverò tutti za embriaghi! Sem ancor sul furgom che pur saendo che la gara la dovrìa esser a Bellamonte, a vardar el titolo della competiziom lezém Zian.... diaolopò, endo g'avente da nar? Co na telefonada ai me cosini de Canazei, me vem confermà Bellamonte...e quindi avanti dritt fin Predaz! E lori (el Silvano e l Patrick de Canazei) i è zà lì che i speta coi pettorali en man! Raccattà subit el gadget della gara (ancoi addirittura se podeva sceglier tra ghette, maietta o calzoti!) el me prim pensier l'è capir le porte direzionali e se serve o men la frontale alogena (che la pesa en kilo): l'arrivo l'è illuminà a giorno! Vabbè, vedo che la maggioranza della zent la g'ha el frontalim piccol, in effetti le ultime do porte visibili dall'arrivo le è illuminae sotto con dei lumini da mort: ensomma no serve tante alogene. Per la discesa, alla fin basta passar tra i do lumini.... le porte le è propri comode e belle larghe! Me la togo dolza e vedo partir el Teo, el Caio, el Max... e na volta tirà a um, vist che el Teo a vinti minuti dalla me partenza l'ha zà finì, ne aprofitto per domandarghe le ultime dritte: "El prim toc , passà la pontèra gh'è en pianoro lonc eterno, quindi quando te fai la curva a destra gh'è l'ultima pontera: dar tutt che te sei zà a 150 metri dalla zima!". Sperem! Me scaldo saltando sul posto per en quart d'ora e i ultimi 5 minuti giro en tondo davanti alla partenza coi sci. Via! Partenza veloce, curva a sinistra, pontèra, pianoro, e entant passo anca 4/5 persone, po' vedo na deviaziom a sinistra e chi credo sia zà ora de dar tutt..... e via!!! En realtà se ero a metà l'era tant... ma è stà meio così: me som tirà el col da bestia, e arrivà veramente alla curva a destra, emponto la rampa passando altre 4 persone e... cambio pelli! Diaolopo', sti moni de scarponi F1 (ancoi per velocizzar g'ho cavà anca le lengue!) i g'ha la clip che no se sèra!!! Azz!!! Devo daverzer for tutt e riligarli perdendo en bon minut... e entant 3 i me passa. E allor en discesa la molo a manetta... diaolopo' che velocità!! A passar for tra i lumini, se demò me parte en sci, el cero ghe toca empizarmelo a mi! Rieso a passar anca en par de persone e giusto sul traguardo arrivo ensema al Zulian (che è stà l'unico a passarme en discesa).... che l'attira l'attenziom de tutti e quasi el Silvano el Patrick e l Teo, che i era lì a spetarme sul traguardo, no i se n'ascorze del me arrivo. Comunque som propri content della prestaziom! Me trao rento ai taoli a zenar, endo che sém al taol ensema alle putèle de Agordo (ma sto colp le g'ha drio i béchi), e magnem... poc en confronto ai altri raduni.... gh'era demò en piatt de pasta: per fortuna el Teo el ne integra el piatt con na bona pizzotta... neanca dirlo che el secont giro de birra me tocca bevermelo da sol (diaolopo'.... massa sportivi!) ma per fortuna el Caio nol manca all'appello con en par de limoncini! Ne trèm for per le premiaziom, e mi per scaldarme no me fao mancar neanca en bombardim. Saludà i cosini de Canazei, ne trèm vers val tentando la connessiom a internet per lezer le classifiche: eccole! Và che bem! Sto colp som propri content! Se po' penso ai secondi brusai per serar i scarponi.... a proposito.... i scarponi, sa ghe sarà vegnù entorno? E così strada facendo, el Teo el n'aproffitta per darghe n'ociada: diaolopo' i gheva el ferett della zosta fuori sede!!! E' bastà en cacciavite e tutt è nà apposto.... e adess per la prossima gara no g'ho pù scuse! che sfiga...





El Caio e l Max zà pronti alla partenza.... diaolopo'.... i se allena en dì sì e n dì sì.... spuàr sangue per starghe drè!!!!
Eh, eh! Granda prestaziom? Gran balòm!!!! No, dai! Però sto colp n bom brindisi superalcolico nol me lo cava nessuni!
..e el Caio, dopo en par de grappini el tasta anca el peso piuma della Roberta!!! Attento Caio!!!! Che la prossima volta i ghe mola drio sò marì a tenderla!!!!


Ste pagine l'e' stae cargade volte da visitatori dal 3 de agost 2005