SCIALPINISTICA Sellaronda del 26/02/2008

Se fra na stimana g'avém la gara, besogn nar a far fià! ...e allor, scartà l'idea dell'alta quota per brutte condiziom (volevém far el Cevedale da Malga Mare, ma na soffiada la n'ha dit che sora gh'è tutt giàz vif pelà dal vent), decidém de far le prove generali propri sul campo... el Sellaronda. Per comodità partìm da Canazei, e co la scusa ne aprofitterem anca de far en po' de shopping all'Amplatz del paess.... Ne trovém dal Teo alle 8 per colaziom e cargà sci e tutine en la Polo (che ancoi la me passa el quart de miliom de Km!! ...eh,eh... finalmente l'è a metà strada!), ne enviém per la val de Fassa. Fatta la dovuta scorta de pèl de foca pezzate all'Amplatz e raccattà el volantim delle piste, ne trèm a parcheggiar al rifugio Lupo Bianco (dosento metri sora Canazei... ensomma, el nos giro ancoi el sarà 200 metri pù cort, ma d'altronde, le piste for per Canazei le vem raccordae sol per l'occasiom della gara! anca se en realtà gh'e' bem la singola discesa en tel centro storico...). Zò le lengue dai F1, na passada veloce de antizoccolo liquido sotto le pèl e definim el .... piano d'azione: passo Sella con pelli azzurre (le g'ha pù tegnua sulle pontère). Gardena ancora pelli azzurre. Campolongo co le nuove pezzate (e sperente che le tegna sul skilift). Pordoi senza dubbio pezzate. Gh'è da nar! Ore 11:07 sém lì che ne enviém su per la pista en direziom passo Sella, propri davanti a en bel cartél de divieto ai scialpinisti. Su de balla! L'è en caldo bestia, e la nèf, l'è zà pappa... e difatti sulla prima pontèra erta le pèl le zede e dovém subit scalettar. Testa bassa e avanti, entant, per fortuna g'ho drio el camelback con zò dò litri de sali minerali, riesso anca a bever qualcoss... La spiana, e con en lonc anell vers sinistra arrivém al cambio pelli e... zò de bala vers Plan de Gralba (endò che traversém en pont drio i impianti sci ai pei) e Selva Gardena. Trat n'ocio all'oroloi, i cancelletti i è ancor davèrti, ma adess? Le piste le finiss en paess... e così, a ocio ne metém a zercar la partenza del Sellaronda dell'an passà. Via de nof! E sempre de balla a ritmo gara... per fortuna el Teo el deve risponder al telefono e l fià riusìm bém a tirarlo qualche minut. Po' i istruttori de sci sulle piste i ne incita a tirar de pù, e allor... mai zeder! La pontèra finale, neanca dirlo, la mpontém dritta e finalmente al cambio pelli del passo Gardena podo fermarme en minut a tirar el fià (el Teo el s'è fermà en minut a metà rampa a ciacerar con en sciador). Cambio pelli (e la tutina, col portapelli incorporato l'è propri comoda) e zò de bala vers Corvara! Altra skettinada en direziom del paess e trate su le pèl pezzate, traversada la strada ripartìm de balla per i longhi pianori che ne speta en direziom del Campolongo. Dopo 10 minuti tirai, sento el Teo che l me diss che poderesém anca far na pausa adess: come no!?!!! Volentéra!!! E l tira for dal zaino na ciopa de speck! Mitico! La va diretta en tel sangue... e anca i 2 litri de camelback che m'ero tirà drio, col calt che l'è i ho zà bevesti tutti: enzima al pass ne toccherà fermarne a comprar da bever. Riciapà el ritmo, con n'ocio ai cancelletti, e qualche deviaziom, traversém el paess, el bosc, e... el skilift? endo elo? mmmm... me sa che st'am i l'ha sostituì co na seggiovia.... al punto che per no sbagliarne la mpontém ancor pù dritta sulla pista de fianc a sinistra... e qi, pèl pezzate o no, gh'è da scalettar per la pappa qualche tochét. Berg Heil Campolongo! Pausa aprèsSki! E dopo na bozza de resta de acqua e aranciata, ne carghém i zaini de 4 bozze de Gatorade (diaolopò... a 4 euro l'una!!! ...da mèz litro!), e fatta na bona pausa de 10 minuti, ne lanciém vers Arabba. Qi la nef l'è propri malta da scavezarse le gambe... Ma l'ultim tòc se no se vol buttar, besogn molarla sui pianori! Ghe sém: Arabba (Italia)... adess dovém ripuntar vers el confim en direziòm del Pordoi. La tolèm massa a destra e finim per traversar prai entrà le case.... Per riciaparne dovém scavezar via a sinistra oltre la strada e n rì. E avanti! El passo l'è sempre tirà, e qi, el Teo, l'accusa el dislivel pù de mi (da no creder!). Ne fermen a bever en par de volte, e a ricordar le condiziom che erem en la gara l'an passà su sto pass (l'era ancor el terz pass e mi zà delirevo!)...ensomma ancoi de lusso! Dopo na deviaziom massa a sinistra, seguìm la strada e no l'è ancor le 5 che ghe sém: Berg heil! Zò le pèl e n ten blitz sem alla macchina con en bocca n'altra ciopa de speck (...eh, la se ghe voleva propri!). All'Imbiss de Predàz la pausa birra e ciopa la se ghe vol tutta e dopo n'altra biretta a cà del Teo, per le 8 arrivo en Trembelem... co la vecia che me domanda se ancoi su per Trent i m'ha fat laorar 'si tant! ...ops.... me ero desmentegà de dirghe a casa che evo tolt ferie!





Lupo Bianco, ore 11:07
Su le tutine e... pronti per le prove generali! Gh'è da nar!
Dopo 2 passi, al Gardena, ancor no se perde en colp... e tant per cambiar se sceglie sempre la pù erta!
Pausa doping! ...ma le barrette del Kepo, en confront ala ciopa de speck che porta el Teo, no le ghe enzola neanca le scarpe!


Ste pagine l'e' stae cargade volte da visitatori dal 3 de agost 2005